काठमाडौं, २४ माघ । चोरहरुले प्रेष कार्ड देखाएर चोर्ने गरेको पाईएको छ । प्रहरीका अनुसार चोरहरुले राजधानीका होटल तथा पार्टी प्यालेसमा हुने कार्यक्रममा प्रेस कार्ड देखाएर छिर्ने र चोरी गर्ने गरेका छन् ।

प्रहरीले गत माघ २० गते यस्तै घटनामा संलग्न तीन जनालाई पक्राउ गरेको छ । काठमाडौको कान्तिपथस्थित होटल प्यागोडमा आइतबार भएको एक कार्यक्रममा प्रेस पास देखाएर होटल छिरेका एक व्यक्तिले लन्च टाइममा सहभागिहरुको व्याग, व्यागमा भएको रकम, ल्यापटप लगायतका सामाग्री बोकेर भागेका थिए ।

यसरी चोरेर भाग्नेमा ललितपुर गोदावरीका अशोक केसी भन्ने हरिशरण केसीलाई प्रहरीले घटना भएको तीनदिनपछि ललितपुरबाट पक्राउ गरेको छ।

केसी फायर साइड दैनिकको प्रेस कार्ड देखाएर उक्त दिन कार्यक्रममा छिरेको प्रहरीले जनाएको छ ।

महानगरीय प्रहरी अपराध अनुसन्धान महाशाखाको टोलीले केसीलाई ललितपुरको लगनखेलबाट पक्राउ गरेको हो । केसीको साथबाट प्रहरीले चोरीका सामानसहित पक्राउ गरेको जनाएको छ ।

अनुसन्धानका क्रममा केसीले राजधानीमा हुने कार्यक्रममा जाने र चोरी गर्ने गरेको खुलेको प्रहरीले जनाएको छ ।