बुटवल १६ भदौ । नेकपा एमालेका अध्यक्ष केपी शर्मा ओलीले नेकपाका महासचिव नेत्र विक्रम चन्द विप्लवलाई शान्तिपूर्ण बाटोमा आफैंले ल्याएको बताएका छन्।

शनिबार बुटवलमा एमाले लुम्बिनी प्रदेश अधिवेशनलाई सम्बोधन गर्दै ओलीले आजकल के जति मोर्चा बनाएर संगै कुम जोडे पनि प्रचण्डले नभई आफूले विप्लवलाई शान्तिपूर्ण राजनीतिमा ल्याएको दावी गरे ।

‘विप्लव त माओवादी प्रचण्डले हिंसा छाडेपनि उनले छाडेका थिएनन्। बम लगाउँदै, आगो लगाउँदै, सुतली बम गर्दै हिँडेका थिए। प्रचण्डले आफूले सँगै ल्याउन सकेका थिएनन, उनलाई हामीले हो राजनीतिको मूलधारमा ल्याएका हौं,’ ओलीले भने।

सीके राउतलाई राष्ट्रिय राजनीतिको मूलधारमा हामीले ल्यायौं। ‘सीके राउतलाई राष्ट्रिय राजनीतिको मूलधारमा हामीले ल्याएका हौं,’ उनले भने।
कार्यक्रममा बोल्दै फरक प्रसंगमा ओलीले एमाले कर्मकाण्डी पार्टी नभएको दाबी गरेका छन्। उनले पार्टीको लुम्बिनी प्रदेशको अधिवेशनलाई सम्बोधन गर्दै सो कुरा बताएका हुन्।

अरु पार्टीको जस्तो अधिवेशनका लागि अधिवेशन आफ्नो पार्टीमा नहुने उनले बताए।

‘नेकपा एमाले कर्मकाण्ड होइन। महान उद्देश्यहरुतर्फ फर्किएको छ। ती उद्देश्यहरु यस पार्टीले गर्ने छ। गरिआएको छ। यसको काँधमा अरु पार्टीजस्तो जसरी भएपनि सरकार बनाउँ, सरकारमा पुगौं र टिकौं भन्ने होइन,’ ओलीले भने।