काठमाडौं, २६ भदौ । लामो समयसम्म बचतकर्ताको रकम फिर्ता गर्न नसकेको सिभिल सेभिङ एण्ड क्रेडिट को अपरेटिभलाई सरकारले बल्ल समस्याग्रस्त घोषित गरेको छ । भदौ २१ को वाग्मती प्रदेश मन्त्रीस्तरीय निर्णयबाट सो सहकारीलाई समस्याग्रस्त घोषणा गरिएको हो ।

समस्याग्रस्त घोषणा गरिएसँगै प्रदेश सरकारले सो सहकारीलाई साधारणसभा नगर्न, नगराउन आदेश दिएको छ । यस कम्पनीको सञ्चालकहरुको वित्तीय स्वार्थका कारण बचतकर्ताको ७ अर्बभन्दा बढी रकम जोखिममा परेको छ । कर्जा प्रवाह गर्दा आफ्नै समूहको सिभिल होम्सलाई मात्रै अत्याधिक प्रवाह गरेपछि सो ऋण असुली नहुँदा सहकारी समस्यामा परेको थियो ।

सहकारीका संस्थापक अध्यक्ष इच्छाराज तामाङ र उनको परिवारले यस सहकारीबाट अस्वभाविक ऋण लिएर विभिन्न कम्पनी खडा गरी घरजग्गामा लगानी गरेको थियो ।

सिभिल सहकारीबाटै ऋण लिएर सिभिल होम्सअन्तर्गत करिब १ हजार १ सय घर बनाएर बेचे पनि त्यसबापत प्राप्त रकम अन्यत्र लगाएका उनले सहकारीको ऋण नतिरी बचतकर्ताको रकम अपचलन गरेका थिए । जसले गर्दा यस सहकारीका बचतकर्ताले अझै पनि रकम फिर्ता पाएका छैनन् । बेलाबेलामा उनीहरूले आन्दोलन गर्ने गरे पनि रकम फिर्ताका लागि प्रभावकारी काम हुन सकेको छैन ।