काठमाडौ १० असोज । गाडीको ठक्करबाट बैतडीमा एक जना सशस्त्र प्रहरीको मृत्यु भएको छ । जिल्लाको पाटन नगरपालिका–८ हरिचन घर भई सशस्त्र प्रहरी बाजुरामा कार्यरत हवलदार ३७ वर्षीय नरेन्द्रसिंह महराको गाडीको ठक्करबाट मृत्यु भएको जिल्ला प्रहरी कार्यालय बैतडीले जानकारी दिएको छ ।
बाजुराबाट घर आइरहेका महरालाई दशरथचन्द राजमार्ग अन्तर्गत हरिचन मोडमा गाडीले राति करिब १ बजेतिर ठक्कर दिएको हुन सक्ने जिल्ला प्रहरी कार्यालयका प्रमुख प्रहरी नायब उपरीक्षक दीपक गिरीले जानकारी दिए ।
ठक्करपछि उनको घटनास्थलमै मृत्यु भएको थियो । प्रहरीले अहिले महरालाई ठक्कर दिने गाडीको खोजी गरिरहेको छ ।‘हामीले गाडी खोजिरहेका छौँ केही शंकास्पद गाडी नियन्त्रणमा छन् केही बेरमै ठक्कर दिने गाडी पहिचान हुन्छ’ प्रहरी नायव उपरीक्षक गिरीले बताए ।
प्रतिक्रिया दिनुहोस्