काठमाडौं, २२ असोज । जिल्ला अदालत काठमाडौंबाट पारिवारिक इजलास सुरु भएको छ । प्रधानन्यायाधीश विश्वम्भरप्रसाद श्रेष्ठले काठमाडौं जिल्ला अदालत पुगेर आज पारिवारिक इजलासको शुभारम्भ गरेका हुन् ।

प्रधानन्यायाधीश श्रेष्ठले संसदीय सुनुवाइका क्रममा पनि पारिवारिक अदालत तत्काल सम्भव नभएको भन्दै तत्कालका लागि पारिवारिक इजलास सञ्चालनमा ल्याउने बताएका थिए ।

उनले कार्यभार सम्हाल्ने क्रममा भने उत्यकका तीन जिल्लाबाट पारिवारिक इजलासको सुरुआत गर्ने घोषणा गरेका थिए । उनले सोमबार पारिवारिक इजलास शुभारम्भ गर्ने क्रममा आफ्नो घोषणा साकार हुन लागेको भन्दै खुसी व्यक्त गरे ।

“पारिवारिक इजलासको महत्व किन हुन्छ भने, यसमा हामी महिलावादी भएका अंशमुद्दा, नाताका मुद्दाहरु, घरेलु हिंसासम्बन्धी मुद्दा र बालबालिकाका हित, सरोकार र हेरचाहसम्बन्धी जोडिएका र अत्यन्त छिटो र छरितो रुपमा किनारा गरिदिनुपर्ने खालका देवानी प्रकृतिका मुद्दाहरुलाई एउटा डेडिकेटेड बेन्च, पारिवारिक इजलासको नामबाट शुभारम्भ गरौँ भन्ने उद्देश्य हो ।

यो सायद हाम्रो न्यायिक प्रणाली र इतिहासमा पनि पहिलोपटक नै हो,” प्रधानन्यायाधीश श्रेष्ठले भने, “यसले विशेष गरी महिलावादी भएर चल्ने अंश मुद्दामा छिटो छरितो, चाँडो फैसला गर्न सक्छ भन्ने उद्देश्य हो । काठमाडौं जिल्लामा त धेरै मुद्दाको संख्या, धेरै लोड छ । तथापि, उहाँहरुलाई प्राथमिकता दिन नसकेर, उहाँहरुलाई हेरविचार गर्न नसक्ने स्थिति होला भनेर महिला, बालबालिकाका लागि एउटा फेमिली बेन्चको नामकरणबाट गरिएको छ ।”

उनले पारिवारिक इजलासले महिलाहरुको लागि केही न केही राहत दिने भन्द छिटो छरितो र विश्वास गर्न सकिने न्याय दिन सक्ने विश्वास व्यक्त गर्ने । “यो सफल भए अन्य मुद्दा पनि हामी थप्न सक्छौँ,” श्रेष्ठले भने ।

काठमाडौं जिल्ला अदालतका सूचना अधिकारी दिपक दाहालले अभ्यासका क्रममा पारिवारिक मुद्दाको समूह बनाएर पेसी तोकिने जानकारी दिए । उनका अनुसार त्यसरी समूहमा पर्ने मुद्दामा गोला प्रणालीबाटै न्यायाधीश तोकिने छन् ।

“अहिलेलाई पारिवारिक मुद्दा व्यवस्थापन गर्न मुद्दाको समूह बनाइन्छ । र, गोला प्रणालीबाट पेसी तोकिन्छ,” दाहालले भने, “डेडिकेटेड इजलास हुन्छ, तर डडिकेटेड न्यायाधीश भने ताकिने छैन ।”

उनले गोला टिप्दा जसलाई पर्छ, उही न्यायाधीशले पारिवारिक मुद्दा हेर्ने जानकारी दिए ।