काठमाडौं, २३ असोज । नेपालले युद्धग्रस्त इजरायलमा रहेका नागरिकलाई स्वदेश ल्याउने सबै तयारी पुरा गरे पनि इजरायलले जहाज उडानको अनुमति दिएको छैन ।सरकारले कूटनीतिक च्यानलमार्फत इजरायलसँग जहाज उडानको अनुमति दिन आग्रह गरेको छ ।

परराष्ट्र मन्त्रालयकी प्रवक्ता सेवा लम्सालले उताबाट जहाज उडानको अनुमति आउने बित्तिकै नेपालीको उद्धारका लागि सबै तयारी पुरा भएको बताइन् । प्यालेस्टाइनी अतिवादी समूह हमास आक्रमणपछि इजरायलमा अन्तर्राष्टिय उडान बन्द छ ।‘गाजा क्षेत्रमा रहेका सबै नेपालीको सकुशल उद्धार भएको छ’, लम्सालले भनिन्, ‘इजरायल सरकारले हवाई उडानको अनुमति दिने बित्तिकै यताबाट जहाज पठाउँछौं ।’मन्त्रिपरिषद बैठकले सोमबार चाटर्ड जहाज पठाएर इच्छुक नेपालीलाई स्वदेश फर्काउने निर्णय गरेको थियो ।

त्यसका लागि राष्ट्रिय ध्वजाबाहक नेपाल एअरलाइन्स र हिमालयन एअरलाइन्सका जहाज तयारी अवस्थामा राख्न मन्त्रिपरिषदले संस्कृति, पर्यटन तथा नागरिक उड्डयन मन्त्रालयलाई निर्देशन दिएको थियो ।यसअघि त्यहाँस्थित नेपाली दूतावासको समन्यवमा इजरायली सेनाले युद्धग्रस्त क्षेत्रमा बंकरभित्र रहेका ३२ नेपाली विद्यार्थीलाई उद्धार गरी सुरक्षित स्थानमा लगेको थियो ।

प्यालेस्टाइनी समूह हमासले इजरायलका विभिन्न सहरमा शनिबार जमिन र आकाशबाट एकैसाथ हमला गरेको थियो । आक्रमणमा १० नेपाली विद्यार्थी मारिएका थिए । एक जना बेपत्ता छन । चार जना घाइतेको उपचार भइरहेको छ । इजरायलमा केयर गिभरका रुपमा ४ हजार ५ सय र परीक्षार्थी विद्यार्थी २ सय ६५ जना रहेको परराष्ट्र मन्त्रालयले जनाएको छ ।