इजरायलमा रहेका दाङको दंगीशरण गाउँपालिका–३ हेकुलीका प्रविण डाँगी परिवारको सम्पर्कमा आएका छन्। छोरासँगको सम्पर्क टुटेपछि परिवार चिन्तामा थियो।

प्रविणका बुवा निमबहादुर डाँडीले आफूलाई इजरायलबाट छोराको फोन आएको र पुनः सम्पर्क भएको जानकारी दिए। टेलिफोन सम्पर्कका क्रममा प्रविणले आफूलाई गोली लागेको र हाल उपचार भइरहेको जानकारी गराएको निमबहादुरले बताए।

उनले भने, ‘अस्पतालबाट नर्समार्फत छोरासँग पुनः सम्‍पर्क भएको छ। खुट्टामा गोली लागेको र हाल उपचार भइरहेको छोराले जानकारी गराएको छ।’

प्रविण गत भदौ २६ मा इजरायल पुगेका थिए। सुदूरपश्चिम विश्वविद्यालयबाट उत्पादित पहिलो कृषि विज्ञ ९सिलेक्टिभ० टोलीमार्फत ११ महिनाको लागि उनी इजरायल पुगेका हुन्।

हाल प्यालेस्टाइनका हमास विद्रोहीले इजरायलमा आक्रमण गरिरहेका छन्। आक्रमणका क्रममा ठूलो संख्यामा मानिसहरु हताहत भएका समाचार अन्तर्राष्ट्रिय सञ्चारमाध्यमहरुले सम्प्रेषण गरिरहेका छन्।

हालसम्म इजरायलमा रहेका १३ जना नेपाली घाइते भएको परराष्ट्र मन्त्रालयले जानकारी दिएको छ। इजरायलस्थित नेपाली दूतावासले आक्रमण प्रभावित क्षेत्रमा बसोबास गरेका नेपालीसँग निकट सम्पर्कमा रहेको जनाउँदै नेपालीको सुरक्षा तथा उद्धारका साथै घाइतेहरूको उपचारका लागि पनि इजरायली अधिकारीहरूसँग सम्पर्क र समन्वय गरिरहेको परराष्ट्रले बताएको छ।

इजरायलको वर्तमान स्थितिलाई दृष्टिगत गरी त्यहाँ सहेका सबै नेपालीलाई सतर्क रहन तथा सम्बद्ध अधिकारीले दिएका सुरक्षा उपायको पालन गर्न सरकारले अनुरोध गरेको छ।