काठमाडौं, १ कार्तिक । चीनको भ्रमणमा रहेका उपप्रधानमन्त्री एवं गृहमन्त्री नारायणकाजी श्रेष्ठ तेस्रो बेल्ट एण्ड रोड अन्तर्राष्ट्रिय सहयोग शिखर मञ्च बीआरएफको उद्घाटन समारोहमा सहभागी भएका छन् ।

चीनका सार्वजनिक सुरक्षामन्त्री वाङ सियाओहङको मैत्रीपूर्ण निमन्त्रणामा चीन भ्रमणमा रहेका गृहमन्त्री श्रेष्ठले बुधबार बेइजिङमा आयोजित बीआरएफ शिखर सम्मेलनको उद्घाटन समारोहमा सहभागिता जनाएका हुन् ।

उद्घाटन समारोहमा चीनका राष्ट्रपति सी चिनफिङले सम्बोधन गरेका थिए । सम्मलेनलाई सम्बोधन गर्दै राष्ट्रपति सीले १० वर्षयता बेल्ट एन्ड रोड अन्तरर्गतका कार्यक्रमले प्रशस्त उपलब्धि हासिल गरेको दाबी गरेका थिए ।

बेल्ट एण्ड रोड सूचना राजमार्ग, रेल राजमार्ग, विमानस्थल, बन्दरगाहलगायतका माध्यमबाट विश्वव्यापी अन्तरसम्बन्ध सञ्जाल निर्माण गर्न सफल भएको र यसले विभिन्न मुलुकका सामान, पुँजी, प्रविधि तथा मानवीय आवतजावतसमेत प्रभावकारी बनेको धारणा उनले व्यक्त गरेका थिए ।

राष्ट्रपति सीलगायत विभिन्न मुलुकका राष्ट्रध्यक्षहरूले उद्घाटन समारोहलाई सम्बोधन गरेका थिए । सम्मेलनमा सहभागी १३० भन्दा बढी मुलुकका प्रतिनिधिहरू बेइजिङ पुगेका छन् ।

सम्मेलनमा उपप्रधानमन्त्री श्रेष्ठसँगै चीनका लागि नेपालका राजदूत विष्णुपुकार श्रेष्ठसमेत सहभागी भएका छन् । उपप्रधानमन्त्री श्रेष्ठले बुधबार आयोजना हुने ‘हरित विकाससम्बन्धी उच्चस्तरीय मञ्च’को नीति र प्रगतिबारेको छलफलमा मुख्य वक्ताका रूपमा सम्बोधन गर्ने कार्यक्रम छ ।