काठमाडौं, १ कार्तिक । चाडपर्वमा अन्य अस्पतालमा चहलपहल कम भइरहँदा राष्ट्रिय ट्रमा सेन्टरमा भने बिरामीको भीडभाड हुने गरेको छ । इमर्जेन्सी कक्षमा घाइतेको चापले ड्युटीमा रहेका स्वास्थ्यकर्मी बिदाको महसुस नै गर्न पाउँदैनन् ।

विशेषगरी दसैँमा सवारी दुर्घटना बढ्दा त्यसको प्रत्यक्ष प्रभाव ट्रमाको इमर्जेन्सी कक्षमा देखिन्छ ।

त्यसो त ट्रमाको इमर्जेन्सीमा अन्य समयमा पनि दुर्घटनाका घाइते आउने गर्छन् । यसै वर्षको साउनमा मात्रै एक हजार ६५७ वटा इमर्जेन्सी केसको उपचार भएको अस्पताल निर्देशक डा। बद्री रिजाल बताउँछन् ।

यो संख्या असोजमा एक हजार ५६४ छ । इमर्जेन्सीमा आउनेमध्ये अधिकांश सवारी दुर्घटनाका घाइते छन् ।

चाडपर्वको समयमा तीव्र सवारी साधन चलाउने, मदिरा सेवन गरेर चलाउनेजस्ता कारणले दुईपांग्रे सवारी बढी दुर्घटना हुने गरेको पाइएको छ ।

यसरी आउने घाइतेमा सामान्य चोटपटकदेखि इमर्जेन्सी शल्यक्रिया गर्नुपर्नेसम्मका अवस्था भएको डा। रिजालको भनाइ छ ।

दसैँमा दुर्घटनाका इमर्जेन्सी केस कति बढी ?
राष्ट्रिय ट्रमा सेन्टरको तथ्यांकमा दसैँ तिहारमा दुर्घटनाबाट इमर्जेन्सीमा आउने घाइतेको अन्य महिनाको भन्दा झन्डै दुईसयले बढी देखिन्छ ।

२०७८ को असोज १ देखि कात्तिक ३० सम्म इमर्जेन्सीमा तीन हजार ३१६ घाइतेको उपचार भएको छ । यो संख्या २०७९ मा तीन हजार ३४ छ ।

असार साउन र दसैँ तिहारका महिनाबाहेक मासिक औसत एक हजार दुईसय इमर्जेन्सी केस हुने गरेको अस्पतालका सूचना अधिकारी नवराज गौतम बताउँछन् ।

३७ बेड इमर्जेन्सी सञ्चालनमा रहेको ट्रमाका लागि दसैँ तिहारमा आउने इमर्जेन्सी केस धान्न हम्मेहम्मे पर्छ ।

“हामीलाई अन्य समयमा पनि इमर्जेन्सी बेड पर्याप्त छैन झन् दसैँको बेला देशभरबाट केस आउँछन् अवस्था सहज हुँदैन,” निर्देशक डा। रिजाल भन्छन् ।

ट्रमाले वार्षिक १९ हजार इमर्जेन्सी केसको उपचार गर्दै आएको तथ्यांक छ ।

इमर्जेन्सी मात्रै झन्डै ५० जना तैनाथ
दसैँ अवधिभरमा दुर्घटनाका घटना बढ्ने हुँदा ट्रमाको इमर्जेन्सीमा झन्डै ५० जना स्वास्थ्यकर्मी ड्युटीमा खटाउने गरिएको छ ।

डा। रिजालका अनुसार ३२ जना स्टाफ नर्स, कन्सल्टेन्ट तथा आवासीय चिकित्सकलगायत ५० जनाको टोली इमर्जेन्सी कक्षमा ड्युटीमा रहन्छन् । यसबाहेक इमर्जेन्सी शल्यक्रियाका लागि विशेषज्ञको टोलीलाई पनि जगेडा राख्ने गरिएको उनी बताउँछन् ।

तर, दुईसय बेडको अस्पतालमा २६७ जना मात्रै सरकारको स्थायी दरबन्दी रहेकाले ट्रमा सेन्टरलाई अझै पर्याप्त जनशक्तिको अभाव रहेको डा. रिजालको भनाइ छ ।