काठमाडौं, १ कात्तिक । नेकपा एमालेले गएराति प्यालेस्टाइनी राज्यको गाजा सहरको अल अहरी अरब अस्पतालमा भएको आक्रमणको भर्त्सना गरेको छ ।
एमाले अध्यक्ष केपी शर्मा ओलीले बुधबार विज्ञप्ति जारी गर्दै त्यस घटनाको निन्दा गरेका हुन् ।
“रकेट आक्रमणबाट ठूलो विस्फोटसहित सिंगो अस्पताल भवन नष्ट हुनुका साथै बालबालिकासहित सयौँको संख्यामा मानिसहरू हताहत भएको विषय जति निन्दा गरे पनि कमी हुन्छ । हामी यस आक्रमणको कडा शब्दमा निन्दा र भर्त्सना गर्दछौँ,” ओलीले भनेका छन् ।
जुनसुकै खाले द्वन्द्व र समस्याको समाधान शान्तिपूर्ण वार्ताद्वारा गरिनुपर्छ भन्ने मान्यता रहेको विज्ञप्तिमा उल्लेख छ ।
अस्पतालमा बिरामी र स्वास्थ्यकर्मीको ज्यान लिनेगरी भएको आक्रमणबाट अन्तर्राष्ट्रिय कानुनको उल्लंघन भएको ओलीको भनाइ छ ।
“निहत्था नागरिक, अस्पतालमा उपचार गराइरहेका बिरामी र स्वास्थ्यकर्मीको ज्यान लिने गरी गरिएको अमानवीय आक्रमणबाट अन्तर्राष्ट्रिय कानुन, मानव अधिकार र मानवीयताका सबै सीमा उल्लंघन भएको छ,” विज्ञप्तिमा भनिएको छ, “हामी यस किसिमका क्रूर र अमानवीय आक्रमण तत्काल रोकिनुपर्छ । निहत्था नागरिकलाई सुरक्षित गरिनुपर्छ ।”
एमालेले यसप्रकारको आक्रमण रोक्न माग पनि गरेको छ ।
“उद्धार तथा आपत्कालीन सहयोगका लागि गाजापट्टीमा मानवीय सहायता प्रदायकहरू जानका लागि अनुमति दिनुपर्छ’ भन्ने मान्यता राख्दछौँ । यसप्रकारका सबैखाले आक्रमण रोक्न हामी सम्बन्धित पक्षलाई आह्वान गर्दछौँ,” विज्ञप्तिमा उल्लेख छ ।
प्रतिक्रिया दिनुहोस्