काठमाडौं, ८ कात्तिक ।  संयुक्त राष्ट्रसंघले गाजामा भइरहेको अन्तर्राष्ट्रिय मानवीय कानुनको स्पष्ट उल्लंघनप्रति गहिरो चिन्ता व्यक्त गरेको छ । राष्ट्रसंघका प्रमुख एन्टोनियो गुटेरेसले नागरिकलाई ‘मानव ढाल’को रूपमा प्रयोग गरेको र दक्षिणी गाजामा इजरायलले गरिरहेको बमबारीको निन्दा गरेका छन् ।

राष्ट्रसंघका प्रमुख गुटेरेसले इजरायलमा हमासको हमला बिनाकारण नभएको टिप्पणी गरेपछि इजरायली कुटनीतिज्ञहरुले आलोचना गर्दै उनको राजीनामाको माग गरेका छन् ।

यसबीच मंगलबार संयुक्त राष्ट्र सुरक्षा परिषद्मा इजरायल–गाजा युद्धलाई लिएर पहिलोपटक खुला बहस भएको छ । बहसमा गाजामा भइरहेको ठूलो विनाश र बढ्दो मानवीय क्षतिका बेला सहायता पुग्नुपर्ने र तत्काल युद्धविराम हुनुपर्ने आह्वान सदस्यले गरेका छन् ।

करिब ९० देश वक्ताको रुपमा रहेको र ३० देशका विदेशमन्त्री सहभागी बहसमा वाशिंगटन भने युद्धविरामको पक्षमा उभिएन ।वाशिंगटनले अमेरिका मानवीय ‘पज’को पक्षमा रहेको बताएको छ ।

गाजामा मंगलबार राति र बुधबार मध्यरातमा थप आक्रामक बमबारी भएको र पछिल्लो २४ घण्टामा ७०० भन्दा बढीको मृत्यु भएको गाजाका स्वास्थ्य अधिकारीहरुले बताएका छन् ।

गाजामा इजरायली आक्रमणमा कम्तीमा ५ हजार ७९१ प्यालेस्टाइनीको ज्यान गइसकेको छ । १० हजारभन्दा बढी घाइते भएका छन् । अक्टोबर ७ मा हमासले गरेको आक्रमणमा इजरायलमा १४ सयभन्दा बढीको ज्यान गएको छ ।