काठमाडौं, २८ माघ । आइसिसी विश्व क्रिकेट लिग डिभिजन–२ अन्तर्गत युएई संगको खेलमा नेपालले टस जितेर पहिले फिल्डिङ गरिरहेको छ। बर्षाले मैदान ओसिलो पारेका कारण आजको खेल ३४ ओभरमा घटाइएको छ।

खेलमा नेपालले सुरुवाती ३ विकेट लिएको छ। दुवै विकेट सोमपाल कामीले लिएका छन्। सोमपालले खेलको तेस्रो बलमै नेपाललाई सफलता दिलाए। उनले असरफ अहमेदलाई शून्य रनमा बोल्ड गरे। यस्तै उनले गुलाम सब्बरलाई १६ रनमा आउट गरे।

करण केसीले १ विकेट हात पारे। उनले युएईका कप्तान तथा ओपनर रोहान मुस्ताफालाई ७ रनमा विकेटकिपर दिलीप नाथबाट क्याच गराए।

युएईले ९ ओभरमा ३ विकेट गुमाएर ३४ रन जोडेको छ।

पहिलो खेलमा जित निकालेका दुवै टिम दोस्रो खेलमा पराजित भएका थिए। डिभिजन–२ को शीर्ष २ भित्र परेर एकदिवसीय विश्वकप छनोट प्रतियोगितामा स्थान बनाउन दुवै टिमका लागि खेल महत्वपूर्ण छ।

यसअघि नेपालले पहिलो खेलमा आयोजक नामिबियालाई १ विकेटले पराजित गरेको थियो। दोस्रो खेलमा नेपाललाई ओमानले ६ विकेटले हराएको थियो।

युएईले पनि पहिलो खेलमा केन्यामाथि २ सय १८ रनको फराकिलो अन्तरको जित हात पारेको थियो। तर, दोस्रो खेलमा युएई क्यानडासँग २३ रनले पराजित भयो। क्यानडा प्रतियोगितामा दुवै खेलमा जित हात पार्ने एक्लो टिम हो।