काठमाडौं । जाजरकोट भूकम्पबाट पीडित परिवारका लागि रिलिफ नेपाल सिन्धुलीले सहयोग गरेको छ ।

अल ह्याण्डस एण्ड हार्टसको सहयोगमा रिलिफ नेपालले जाजरकोटको नलगाड नगरपालिकाका ९० घर परिवारलाई सहयोग हस्तान्तरण गरेका हुन् ।

जिल्ला प्रशासन कार्यालय र नलगाड नगरपालिकाको समन्वयमा रिलिफ नेपालले प्रतिपरिवार त्रिपाल एक थान, म्याट्रेस २ थान र कम्बल २ थान वितरण गरेको हो । सहयोग प्राप्त गर्नेमा तीन मृतकका परिवार र सात सुत्केरी परिवार समेत छन् ।

भूकम्प पीडितका लागि सहयोग गर्न सिन्धुलीबाट रिलिफ नेपालको तर्फबाट कार्यकारी निर्देशक खुसराज पौडेल, बोर्ड सदस्य लिलबहादुर लुम्रे र विवेक गौतम जाजरकोटमा छन् ।

स्थानीय रुपमा ग्रामीण समाज नेपालका साथै राष्ट्रिय भलिवल खेलाडी कामना विष्ट, मोतीलाल वली, युवराज शर्मा, लक्ष्मण सिंह ठकुरी र कमला रावलले स्वयमसेवकका रुपमा सहयोग गरेका छन् ।

आज र भोलि थप भूकम्प पीडित परिवारलाई सहयोग गर्ने कार्यक्रम रहेको छ ।

भूकम्प पीडितलाई सहयोग उपलव्ध गराएसँगै बागमती र मधेस प्रदेशमा काम गर्दै आएको रिलिफ नेपालले कर्णाली प्रदेशमा समेत काम थालेको छ ।