काठमाडौं । हमासले अक्टोबर ७ मा इजरायलमा अचानक आक्रमण गर्‍यो । ठूलो जनधनको क्षति भयो । लगत्तै जवाफी कारबाही थालेको इजरायली सेनाले निरन्तर आक्रमण गरिरहेको छ ।
परिणामस्वरूप गाजा ध्वस्त भइरहेको छ । बिहीबार साँझसम्म गाजामा साढे ११ हजार जनाले ज्यान गुमाइसकेका छन् । घाइते र ध्वस्त भएका संरचनाका कुनै हिसाब छैन । ठूलो संख्यामा नागरिक विस्थापित भएका छन् ।
आक्रमणकै दौरान बुधबार इजरायली सेना अस्पतालमा प्रवेश गरेको छ । इजरायली सेना गाजाको प्रमुख अस्पाल अल–शिफामा छिरेको हो ।
हमासले अस्पतालभित्रबाट आफ्नो भूमिगत सञ्जाल विस्तार गरेकाले आफूहरूले यो कदम चालेको इजरायली सेनाको दाबी छ ।
यसै दौरान इजरायली सेनाले बीबीसीका पत्रकारलाई अस्पतालभित्र जान दिएको छ । उच्च सुरक्षाका साथ एउटा टेलिभिजनको टिम र आफ्ना रिपोर्टरलाई इजरायली सेनाले अस्पतालको अवलोकन गराएको बीबीसीले जनाएको छ ।