काठमाडौं, १ मंसिर । टर्कीका विदेशमन्त्री हकान फिदानले गाजामा भएको आक्रमणमा पश्चिमाहरूको मौनतालाई अराजकतालाई अनुमोदन गरेको संकेतका रुपमा बुझ्न सकिने बताएका छन् ।

गाजामा इजरायलको आक्रमणमा पश्चिमा देशको मौनता विश्वभरका अन्य अराजक गतिविधिहरूलाई ‘ग्रिन सिग्नल’ दिनु बराबर रहेको उनको टिप्पणी छ ।

प्रतिरोधका लागि मस्जिद, अस्पताल र विद्यालयहरूमा बम विष्फोट गरिन्छ भने आफूहरू मौन बस्न नसक्ने उनको चेतावनी छ । टर्कीको विदेश मन्त्रालयले बुधबार इजरायली अधिकारीहरूको आलोचना गर्दै टर्कीका राष्ट्रपति रेसेप तैयप एर्डोगानविरुद्ध लगाएका आरोप निराधार भएको बताएका छन् ।

इजरायलले अक्टोबर ७ मा दक्षिणी इजरायलमा हमासको हमलाको बिरुद्धमा बदला लिन गाजामा पूर्णरूपमा आक्रमण गरिरहेको छ । उक्त आक्रमणमा हमास लडाकुहरूले इजरायलमा करिब १ हजार २ सय व्यक्तिको हत्या गरेका थिए । दुई सयभन्दा बढी बन्धक बनाएका थिए ।