सुर्खेत, २९ माघ। प्रदेश नं ६ मा वाम गठबन्धनले सरकार गठनको तयारी गरेको छ । सरकार गठनका लागि फागुन ३ गते प्रदेश प्रमुखसामू दाबी पेश गर्ने तयारी गरेको छ ।
वाम गठबन्धनमा प्रदेश ६ को मुख्यमन्त्री माओवादीले को भागमा परेपछि माओवादी केन्द्रले संसदीय दलको नेतामा महेन्द्रबहादुर शाहीलाई चयन गरिसकेको छ । सभामुखको निर्वाचन सकियो अब फागुन ३ गते मुख्यमन्त्रीको दावी पेश गर्ने तयारीमा रहको संसदीय दलको नेता शाहीले बताए ।

एमाले र माओवादीको प्रष्ट बहुमत भएकाले शाही ३ गते नै मुख्यमन्त्री नियुक्त हुनेछन् । ४० सदस्यीय प्रदेशसभामा एमाले २० र माओवादी १३ गरी ३३ सांसद छन् ।

मन्त्रीमा क–कसको दाबी ?

प्रदेश सरकार गठनको तयारीसँगै सांसदहरुले मन्त्रीका लागि आ–आफ्नो लबिङ थालेका छन् । मुख्यमन्त्रीको दौडबाट बाहिरिएका माओवादी केन्द्रका सांसद नरेश भण्डारी क्याविनेटमा आउने अनुमान गरिएको छ । माओवादी नेताहरुले आफ्नो भागमा परेका मन्त्रालयहरु मध्ये रोजेर लिन भण्डारीलाई भनेको माओवादी केन्द्रको स्रोतको बताएको छ ।

भण्डारीले भने आफूले धारणा बनाइनसकेको बताएका छन् । ‘क्याविनेटमा जाने कि नजाने भन्ने मैले अहिले त्यो सोचेको छैन,’भण्डारीले भने,’यस सम्बन्धमा छलफल हुन्छ ।’

प्रदेश ६ मा सभामुख र चार मन्त्री एमालेको भागमा परेको छ भने उपसभामुख, मुख्यमन्त्री र दुई मन्त्री माओवादीको भागमा परेको छ ।

एमालेभित्र जाजरकोटका करवीर शाही, डोल्पाका दल रावल, दैलेखका अम्मरबहादुर थापा, सुशील थापा, सल्यानका गुलाबजंग शाह, सुर्खेतकी पदमा खड्का लगायले मन्त्रीका लागि लविङ गरिरहेका छन् ।

यस्तै सांसद पदम रोकाय, खड्क केसी पनि मन्त्रीका लागि आकांक्षी देखिएका छन् भने सभामुखको दावी गरिरहेका मुगुका चन्द्र शाहीलाई पनि एमालेले चित्त बुझाउनु पर्ने छ ।

यस्तै माओवादीभित्र पनि दुई मन्त्रीका लागि धेरै आकांक्षी देखिएका छन् । माओवादीको भागमा महिला परेको खण्डमा सीता नेपाली र बिमला केसी मध्ये एक जना मन्त्री बन्ने निश्चित छ ।

विन्दमान विष्ट, ठम्मर विष्ट, धर्मराज रेग्मी, गणेशप्रसाद सिंह, रातो कामी, गोपाल शर्मा पनि मन्त्रीका दावेदार हुन् ।