काठमाडौं, ११ पौष । नेपाल दूरसञ्चार प्राधिकरणले अघि सारेको टेलिकम्युनिकेसन ट्राफिक मनिटरिङ एन्ड फ्रड कन्ट्रोल सिस्टम अर्थात् ‘टेरामक्स’ जडानको विषयमा नेपाल टेलिकम गम्भीरता जताएको छ ।

बुधबार संसदीय सार्वजनिक लेखा समितिको बैठकमा बोल्दै नेपाल टेलिकमकी प्रबन्ध निर्देशक संगीता पहाडी अर्यालले टेरामक्सको विषय २ करोड ग्राहकको गोपनीयतासँग जोडिएको बताएकी छन् ।

उनले नियामक निकाय प्राधिकरणले टेरामक्स ल्याउनुअघि नै मोनिटरिङ निगरानी प्रणाली रहेको बताएकी छन् । लेखा समितिको बैठकमा बोल्दै उनले भनिन्,“हामी कानुनको प्रतिक्षामा छौं । काम गर्ने प्रणाली हामीसँग छ । हामीसँग रेभिन्यु एसोरेन्स सिस्टम छ । आवश्यक परेको बेला नियामक निकायले अनुगमन गर्न सक्छ ।”

प्राधिकरणले घट्दो राजस्व र टेलिकम कम्पनीको पारदर्शिताका लागि आवश्यक रहेको भन्दै टेरामक्स जडान गर्ने योजना अघि सारेको थियो । ग्राहकको गोपनीयता र अन्य कारणले यो योजना विवादमा आएको छ ।