काठमाडौं, ३ फागुन । आइसिसी वर्ल्ड क्रिकेट लिग डिभिजन टूको उपाधिका लागि युएईसँग भिडिरहेको नेपालले दुई सय ७८ रनको लक्ष्य पाएको छ।

टस जितेपछि पहिला ब्याटिङ गर्ने निर्णय गरेको यूएईले निर्धारित ५० ओभरमा ४ विकेट गुमाएर दुई सय ७७ रन बनाएको हो। युएईका असफाक अहमदले ११४ रन बनाए । उनलाई तेस्रो विकेटका रुपमा सन्दीप लामिछानेले आउट गरे। असफाकले पहिलो विकेटका लागि कप्तान रोहन मुस्ताफासँग एक सय ९ रनको साझेदारी गरेका थिए।

कप्तान मुस्ताफाले ५१ रन बनाए। बसन्त रेग्मीले आफ्नो चौथो ओभरको पहिलो बलमा मुस्ताफालाई आउट गरे। युएईले एक सय ६३ रन जोड्दा विकेटकिपर घुलाम सब्बिर १८ रनमा आउट भएका थिए । उनलाई सन्दीप लामिछानेले रन आउट गरे । यूएईका साइमान अनवरले ४० रन बनाए। उनले २४ बलमा तीन छक्का र दुई चौका हिर्काए। रमिज सेहजादले अविजित ४१ रन बनाए। सेहजाद र अनवरबीच ५५ रनको साझेदारी भएको थियो।

प्रतियोगितामा सन्दिपको शानदार बलिङ

सन्दिप लामिछानेले प्रतियोगिता अवधिभर खेलेका ६ खेलमा ५४.२ ओभर बलिङ गर्दै नौ मेडन राखेर एक सय ७६ रन खर्चदैं १७ विकेट लिएका छन्। उनी दुई खेलमा प्लेयर अफ दी म्याच घोषित भए।

अहिले भईरहेको फाईनल खेलमा सन्दिपले १० ओभरमा ३९ रन दिएर एक विकेट लिए।

सन्दिपले प्रतियोगिताको पहिलो खेलमा नामिबियाविरुद्ध ८.२ ओभरमा दुई मेडन राखेर १८ रन दिंदै चार विकेट लिएका थिए।

दोस्रो खेलमाम ओमानविरुद्ध उनले १० ओभरमा २९ रन दिएर दुई विकेट लिएका थिए।

तेस्रो खेलमा यूएईविरुद्ध सात ओभर बलिङ गरेका सन्दीपले एक मेडन राख्दै ३० रन खर्चिएर तीन विकेट लिएका थिए।

चौथो खेलमा उनले केन्याविरुद्ध १० ओभरमा पाँच मेडन राखेर २० खर्चदै‌ं पाँच विकेट लिएका थिए।

उनले राउन्ड रोबिनको पाँचौं तथा अन्तिम खेलमा क्यानडाविरुद्ध नौ ओभरमा एक मेडन राखेर ४० रन दिदैं २ विकेट लिएका थिए।