काठमाडौं १८ माघ । भारतले नेपाललाई दिने अनुदान रकममा १०० करोड भारतीय रुपैयाँ बढाएको छ । बिहीबार भारतीय संसद्‍मा अर्थमन्त्री निर्मला सीतारमणले पेस गरेको अन्तरिम बजेटमा नेपाललाई दिइने अनुदान बढाइएको उल्लेख छ ।

यसअघि गत वर्ष फेब्रुअरी १ मा प्रस्तुत २०२३र२०२४ को बजेटमा नेपाललाई ५५० करोड भारतीय रुपैयाँ अर्थात ८ अर्ब ८० करोड नेपाली रुपैयाँ अनुदान सहयोग गर्ने उल्लेख थियो । बिहीबार प्रस्तुत बजेटमा उक्त रकमलाई परिमार्जन गर्दै ६५० करोड भारु अर्थात १० अर्ब ४३ करोड नेपाली रुपैयाँ पुर्‍याइएको हो ।

दक्षिण एसियाली मुलुकहरूमा भारतले सबैभन्दा बढी मालदिभ्सलाई अनुदान सहयोग गर्ने भएको छ । २०२३र२०२४ का लागि भारतले मालदिभ्सलाई ७७० करोड भारु अनुदान दिने भएको छ । यसअघि प्रस्तुत गरिएको बजेटमा भने मालदिभ्सलाई ४०० करोड भारु अनुदान दिने उल्लेख थियो । बिहीबार पेस गरिएको बजेटमा उक्त रकमलाई परिमार्जन गर्दै ३७० करोड भारु बढाइएको हो ।

त्यस्तै भुटानलाई दिने अनुदान रकम घटाएर भारतले ऋण भने बढाएको छ । यसअघि १ हजार ६ सय ३२ करोड अनुदान र ७ सय ६८ करोड ऋण दिने उल्लेख भएकोमा बिहीबार उक्त रकमलाई परिमार्जन गर्दै अनुदान ७ सय ८४ करोड र ऋण १ हजार ६ सय १४ करोड दिने उल्लेख गरिएको छ ।

भारतले श्रीलंकालाई दिने अनुदान रकम भने घटाएको छ । यसअघि १५० करोड भारु अनुदान दिने अनुमान पेस गरिए पनि बिहीबार पेस बजेटमा उक्त रकम घटाउँदै ६० करोडमा झारिएको छ । त्यस्तै अफगानिस्तानलाई दिने अनुदान र ऋणमा २०र२० करोड बढाएर २२०र२२० करोड भारु पुर्‍याइएको छ । त्यस्तै अर्को छिमेकी मुलुक बंगलादेशलाई दिने अनुदान रकममा पनि भारतले ७० करोड कटौती गरेको छ । बंगलादेशलाई भारतले १३० करोड भारु अनुदान दिने बजेटमा उल्लेख छ ।

अर्थमन्त्री सीतारमणले २०२४ को लोकसभा चुनावअघि संसद्‍मा अन्तरिम बजेट पेस गरेकी हुन् । उनले बजेट पेस गर्ने क्रममा भारतीय बजेट(२०२४ लाई ुभारतको भविष्यको बजेटु बताइन् । उनले आफ्नो सम्बोधनमा सन् २०४७ सम्ममा भारतलाई विकसित राष्ट्र बनाउने पनि जनाएकी छिन् ।

अर्थमन्त्री सीतारमणले सौर्य ऊर्जाअन्तर्गत १ करोड घर परिवारलाई ३०० युनिट बिजुली निस्शुल्क उपलब्ध गराउने उल्लेख गरेकी छिन् । त्यस्तै पाठेघरको क्यान्सर रोकथामका लागि ९ देखि १४ वर्षका बालिकाहरूलाई खोप लगाउने पनि बजेटमा उल्लेख छ ।