काठमाडौं ९ बैशाख । राष्ट्रिय सभाका उपाध्यक्ष विमला घिमिरेले महिला सांसदहरुलाई हतोत्साहित गर्न नहुने बताएकी छन् । आइतवार आफ्नो कार्यकक्षमा सञ्चारकर्मीहरुसँग भेटघाट गर्दै उपाध्यक्ष घिमिरेले महिला सांसदहरुले बोलेको कुरालाई लिएर विभिन्न टिकाटिप्पणी हुने गरेको भन्दै उनीहरुलाई अत्याउने र हतोत्साहित गर्ने काम गर्न नहुने बताइन् ।

उनले महिला सांसदहरुले संसद्‌मा बोलेको कुरालाई लिएर ०६४ सालको संविधानसभादेखि नै टिकाटिप्पणी गरिने गरेको बताइन् । उनले महिला सांसदहरुको क्षमतामाथि समेत प्रश्न उठाइने गरेको भन्दै त्यसो गर्न नहुने बताइन् ।

उनले ऐतिहासिकरुपमा पछाडि पारिएका महिलाहरु एक्कासी राजनीतिमा आएर सांसद हुँदा उनीहरुको बोल्ने क्षमता नहुनु स्वभाविक भएको भन्दै त्यहीकारण उनीहरुलाई हेर्ने दृष्टिकोण फरक हुन नहुने बताइन् । उपाध्यक्ष घिमिरेले व्यक्तिको बोल्ने तरिका फरक–फरक हुने गरेको भन्दै सांसदहरुले जुन तरिकामा भएपनि आफ्नो भावना व्यक्त गर्ने गरेका बताइन् ।

‘महिला सांसदहरुको क्षमताको विकास गर्नुपर्छ । त्यो सकारात्मक कुरा हो । तर क्षमता विकास भइसकेकालाई ल्याउने कि रु त्यो क्षेत्र, समुदायलाई समेटेर यहाँ ल्याउने भन्ने कुरा हाम्रो व्यवस्था अनुसार गर्ने हो । हिजो महिलाहरु आन्दोलनका लागि लड्नुभएको हो । लडाइँमा अग्रपंक्तिमा रहेका महिला माननीयहरु अहिले आएर संसदमा बोल्न सक्ने कुरै हुदैन,ु उनले भनिन् ।

उनले संविधानमै भएको व्यवस्था, सकारात्मक विभेदको नीतिलाई सबैको स्वीकार्यता नरहनु दुखद भएको बताइन् । उनले उपसभामुख, राष्ट्रिय सभा उपाध्यक्ष तथा स्थानीय तहको उपप्रमुखको पद महिलाहरुकै लागि हो भन्ने मानसिकता बनेको भन्दै त्यसलाई चिर्नुपर्ने चुनौती रहेको बताइन्। उनले राष्ट्रिय सभा उपाध्यक्षको आफ्नै अधिकारहरु रहेको भन्दै सो पद अध्यक्षको छायाँको रुपमा नरहेको समेत दाबी गरिन् ।