काठमाडौ २२ बैशाख । डेनमार्कले गर्भपतनको कानूनी सीमा १८ हप्तासम्ममा विस्तार गर्ने भएको छ । अहिले गर्भपतनको सीमा १२ हप्ता रहेकोमा यसलाई बढाएर १८ हप्तासम्म पुर्याउने तयारी थालेको त्यहाँको स्वास्थ्य मन्त्रालयले जनाएको छ ।स्वास्थ्यमन्त्री सोफी लोहडेले गर्भपतनलाई नियन्त्रित गर्ने नियम परिवर्तन गर्ने र महिलाको निर्णय गर्ने अधिकारलाई बलियो बनाउने समय आएको बताउनुभएको समाचार संस्था एएफपीले उल्लेख गरेको छ ।

यसका अतिरिक्त १५ देखि १७ वर्ष उमेरकालाई आफ्ना आमाबुबाको सहमतिबिना नै गर्भपतन गर्न अनुमति दिइनेछ ।गएको वर्ष नै डेनिस नैतिकता समितिले गर्भपतनको समय सीमालाई १२ हप्ताबाट १८ हप्तासम्म बढाउन सिफारिस गरेको थियो । पश्चिम युरोपमा गर्भपतनलाई अनुमति दिने पछिल्ला देशहरुमा बेलायत र नेदरल्यान्ड्समा २४ हप्ता र आइसल्यान्डमा २२ हप्तासम्म रहेको छ ।