नयाँदिल्ली, भदौ ९ गते । चिनियाँ राष्ट्रपति सी जिनपिङ आगामी सेप्टेम्बरमा भारतको नयाँदिल्लीमा हुने ब्रिक्स शिखर सम्मेलनमा सहभागी हुने सम्भावना बढेको छ। रोयटर्सका अनुसार तीन भारतीय स्रोतले सी ठूलो प्रतिनिधिमण्डलसहित भारत आउने सम्भावना रहेको जानकारी दिएका छन्। यद्यपि उनको भ्रमणबारे अन्तिम निर्णय भने भइसकेको छैन।

भारतले आगामी सेप्टेम्बर १२ र १३ गते ब्रिक्स शिखर सम्मेलन आयोजना गर्दैछ। सीको भ्रमण भएमा यो सात वर्षपछि उनको पहिलो भारत भ्रमण हुनेछ। सन् २०१९ मा भारत भ्रमण गरेयता उनको नयाँदिल्ली यात्रा भएको छैन।

सीको सम्भावित भ्रमणलाई सन् २०२० को सीमा झडपपछि तनावपूर्ण बनेको चीन–भारत सम्बन्ध सुधार गर्ने प्रयासका रूपमा हेरिएको छ। पछिल्लो समय दुवै देशबीच उच्चस्तरीय संवाद र सीमा विवाद व्यवस्थापनका प्रयास तीव्र भएका छन्।

४०० सदस्यीय प्रतिनिधिमण्डलको तयारी

रोयटर्सका स्रोतका अनुसार चिनियाँ अधिकारीहरू भारत भ्रमणका लागि होटल तथा सुरक्षा व्यवस्थालाई अन्तिम रूप दिन जुटेका छन्। दुई भारतीय स्रोतले सीसँग करिब ४०० सदस्यीय प्रतिनिधिमण्डल भारत आउने सम्भावना रहेको बताएका छन्।

सन् २०१९ को भ्रमणमा सीसँग भारत आएका चिनियाँ अधिकारीको संख्या २०० भन्दा कम थियो। यसपटक प्रस्तावित प्रतिनिधिमण्डल त्यसको तुलनामा दोब्बरभन्दा बढी हुनेछ। (

सीको सम्भावित उपस्थितिलाई यसपटक ब्रिक्सको औपचारिक एजेन्डाभन्दा चीन–भारत सम्बन्धमा सुधारको संकेतका रूपमा बढी चासोका साथ हेरिएको छ। विशेषगरी २०२० को सीमा तनावपछि दुई देशबीच बनेको दूरी घटाउने दिशामा यो भ्रमण महत्वपूर्ण हुन सक्ने कूटनीतिक अपेक्षा गरिएको छ।

Originally published on abcnews.com.np.