काठमाडौं ७ जेठ । प्रमुख प्रतिपक्षी दल नेपाली कांग्रेसले आइतबारको प्रतिनिधिसभा बैठकमा उपप्रधान एवं गृहमन्त्री रवि लामिछाने हिंस्रक ढंगबाट प्रस्तुत भएको निष्कर्ष निकालेको छ।

सोमबार बिहान सिंहदरबारस्थित पार्टी संसदीय दलको बैठकले उनको अभिव्यक्तिप्रति घोर निन्दा र भत्र्सना गरेको प्रमुख सचेतक रमेश लेखकले बताए।

‘प्रतिनधिसभामा जे कुरा बोल्नुभएको छ, त्यो असत्य, असभ्य, भ्रामक, कपोकल्पित र हिंस्रक ढंगले प्रस्तुत हुनुभएको छ। उपप्रधान एवं गृहमन्त्रीको जिम्मेवारीमा रहेका मान्छेले प्रश्न सोध्ने होइन, आफ्नो जवाफ दिने हो,’ लेखकले अघि भने, ‘अरुमाथि तथाकथित विषयलाई उठाएर उहाँ आफूमाथि लगाएका अभियोगबाट भाग्ने प्रयास गर्नुभयो। त्यो भाग्नका लागि असत्य र हिंस्रक ढंगले प्रस्तुत गर्नुभएको छ। उहाँको अभिव्यक्तिप्रति घोर निन्दा र भत्र्सना गरेको छ।’

साथै, उनले संसदीय छानबिन समिति कांग्रेसको प्रमुख बटमलाइन भएको पनि बताए।

‘आजको बैठकले हामीले सहकारीको ठगीमा संलग्न माननीय रवि लामिछानेजी, सम्बन्धित सहकारी र कम्पनीलाई कडा कारबाही, स्वतन्त्र निष्पक्ष छानबिन गर्न संसदीय छानबिन समिति बनाउने कुरामा हामी दृढ छौँ। छानबिन समिति हाम्रो बटमलाइन हो,’ उनले भने।