काठमाडौं । नेकपा (एमाले) का अध्यक्ष केपी शर्मा ओलीले पार्टी रूपान्तरणको नाममा गतिविधि गरिरहेका नेताहरू तथा कार्यकर्तालाई पार्टीको अनुशासन पालना गर्न चेतावनी दिएका छन्।

शनिबार इलाममा आयोजित कार्यक्रममा ओलीले पार्टीको विरोध गर्दै सामाजिक सञ्जालमा जथाभावी लेख्ने र पार्टी कार्यालयको क्यान्टिनमा बसेर हुलदंगा गर्ने गतिविधि बन्द गर्न चेतावनी दिए।

यस्ता गतिविधि नरोकिए पार्टी विधानअनुसार कारबाही गरिने उनले बताए।

‘पार्टीको विरोध गरेर, सामाजिक सञ्जालमा जे पायो त्यही लेखेर हिँड्न पाइँदैन। पार्टीमा बस्ने हो भने अनुशासनमा बस्नुपर्छ। अर्को पार्टीमा जाने हो भने त्यहीँको अनुशासन पालना गरे हुन्छ,’ ओलीले भने, ‘पार्टीमा काम नगर्ने हो भने घरै बसे हुन्छ। सम्झाउँदा पनि नमान्नेलाई विधि र विधानअनुसार कारबाही गरिन्छ।’

एमालेको मत घटेकोमा ओली चिन्तित

ओलीले फागुन २१ गते भएको निर्वाचनमा एमालेको मत घट्नु गम्भीर विषय भएको बताए। पार्टीका सदस्यको संख्या धेरै भए पनि निर्वाचनमा प्राप्त मत कम हुनुको कारण खोजी गर्नुपर्ने उनको भनाइ छ।

‘२८ लाख भोट आएको ठाउँमा १४ लाख मात्र भोट आउनु गम्भीर कुरा हो,’ ओलीले भने, ‘पार्टी सदस्य धेरै हुने तर भोट कम आउने अवस्थालाई सुधार्नु छ। साथीहरूलाई इमानदार बनाउनु छ।’

उनले पार्टीभित्र कुनै विग्रह नआउने दाबी गर्दै संगठनलाई एकताबद्ध बनाएर अघि बढ्ने बताए। पार्टी रूपान्तरणका नाममा हुने विवाद र अराजक गतिविधिले संगठनलाई कमजोर पार्ने भएकाले त्यस्ता गतिविधि स्वीकार्य नहुने ओलीको भनाइ छ।

Originally published on abcnews.com.np.