काठमाडौं ७ जेठ । सत्तारुढ प्रमुख घटक नेकपा एमाले० का उपाध्यक्ष विष्णुप्रसाद पौडेलले प्रधानमन्त्री पुष्पकमल दाहाल ‘प्रचण्ड’ नेतृत्वको वर्तमान सरकारले पूरै कार्यकाल काम गर्ने बताउनुभएको छ ।

सोमबार प्रतिनिधि सभाको दोस्रो बैठकमा प्रधानमन्त्री प्रचण्डले राख्नुभएको विश्वासको मतमाथिको छलफलमा भाग लिँदै उहाँले सो कुरा बताउनुभएको हो ।

उपाध्यक्ष पौडेलले प्रधानमन्त्री दाहाललाई अझ दह्रो कदमका साथ अघि बढ्न पनि आग्रह गर्नुभयो । उहाँले सिङ्गो देश र संसद्ले साथ दिने भएकाले प्रधानमन्त्री दाहालले पछि हट्नुपर्ने कुनै कारण नभएको बताउनुभयो । त्यस अवसरमा उपाध्यक्ष पौडेलले प्रधानमन्त्री दाहाललाई सरकारमा सहभागी सबै दलले विश्वासको मत दिने विश्वास व्यक्त गर्नुभयो ।

उहाँले भन्नुभयो, ‘म सम्माननीय प्रधानमन्त्री प्रचण्डलाई अग्रिम बधाई भन्न चाहन्छु, तपाईँले हिजोभन्दा अझ फराकिलो आधारमा विश्वासको मत प्राप्त गर्दै हुनुहुन्छ । प्रधानमन्त्रीज्यू तपाई दह्रो कदमका साथ अघि बढ्नु होला ।’

सिङ्गो सदनको उहाँलाई साथ रहने उहाँले बताउनुभयो । एमालेलगायत सरकारमा सहभागी सबै राजनीतिक दलहरूको तर्फबाट विश्वासको मत प्रदान गरिने ब्यहोरा अनुरोध गर्दछु, उहाँले भन्नुभयो ।

उपाध्यक्ष पौडेलले मुलुकको विकास र समृद्धिको अभियानलाई तीव्रता दिन पनि सरकार र सत्तारुढ दलहरू प्रतिबद्ध भएर लागिपरेको बताउनुभयो ।