काठमाडौं २६ असार । संसदका मुख्य दुई दल कांग्रेस र एमालेबीच सहमति भएअनुसार आगामी ३० गते आइतबार एमाले अध्यक्ष केपी शर्मा ओली प्रधानमन्त्री नियुक्त हुने भएका छन् । हरेक दिनजसो कांग्रेस र एमालेका अलग अलग समूहमा अब बन्ने सरकारमा मन्त्रीहुनेहरु बारे छलफल भइरहेको छ । एमाले अध्यक्ष ओली सचिवालय बैठकबाट मोटामोटी मापदण्ड बनाएको निर्णय त गराएका छन् । तर ओलीले आफू प्रधानमन्त्रीमा नियुक्त भइसकेपछि मात्र एमालेबाट मन्त्री हुनेहरुको नाम जानकारी गराउने भएका छन् । उनले विभिन्न नेताहरुका सुझाव मात्र सुनिरहेका छन् । दुई दलबीच प्रधानमन्त्री हुने दलले १० वटा मन्त्रालय र अर्को दलले ११ वटा मन्त्रालय लिने सहमति भएको छ ।

एमालेले अर्थ, सञ्चार, भौतिक योजना, कानुन, भूमिसुधार, महिला बालबालिका र रक्षा लगायतका मन्त्रालय लिने टुंगो लागेको बताइएको छ । कांग्रेसले गृह, परराष्ट्र, शहरी विकास, सामान्य प्रशासन श्रम तथा रोजगार लगायतका मन्त्रालय टुंगो लागेको देउवा निकट एक केन्द्रीय सदस्यले बताएका छन् । कांग्रेसबाट नेतृत्व गरेर कसलाई पठाउने भन्नेमा शेखर कोइराला, प्रकाशमान सिंह र गगन थापा मध्ये एकजना हुने बताइएको छ। शेखर कोइरालाले परराष्ट्र मन्त्रालय मागेका कारण उनको सम्भावना कम देखिएको छ । देउवाले पत्नी आरजुलाई नै परराष्ट्रमन्त्री र रमेश लेखकलाई गृह बनाउने कुरामा दायांबायां नहुने स्पष्ट गरिदिइसकेका छन् ती केन्द्रीय सदस्यले भने ।

असार २८ गते प्रधानमन्त्री पुष्पकमल दाहाल प्रचण्डको विश्वासको मत फेल गरेपछि दुई दलका सांसदहरु समेतको झण्डै १९० सांसदको हस्ताक्षर संयुक्त सरकार बनाउन भन्दै राष्ट्रपति रामचन्द्र पौडेल समक्ष पेश गरिनेछ ।
संसद सचिवालयका अनुसार सभामुख देवराज घिमिरेले सांझ ६ बजेसम्म बहालवाला प्रधानमन्त्री प्रचण्डले विश्वासको मत प्राप्त गर्न असफल भएर पदमुक्त भएको पत्र राष्ट्रपतिलाई बुझाएपछि नयाँ सरकार गठनको प्रक्रिया शुरु हुनेछ । संविधानको धारा ७६ को उपधारा २ अनुसार गठन भएको संयुक्त सरकार असफल भएमा उपधारा ३ अुनसार संसदको सवैभन्दा ठूलो दलको नेतालाई अल्पमतको प्रधानमन्त्री नियुक्त गर्ने संवैधानिक व्यवस्था छ । यही विषयमा स्पष्ट हुनका लागि गत असार १७ गते नै कांग्रेस एमालेका नेताहरुले राष्ट्रपतिलाई मौजुदा सरकार असफल भएपछि पनि एकपटकका लागि सोधी धारा अनुसार संयुक्त सरकार गठनको आह्वान गर्ने आश्वासन दिएपछि देउवा र ओलीले हस्ताक्षर गरेका थिए ।

देउवाको किचेन क्याविनेटका एक केन्द्रीय सदस्यका अनुसार देउवाले पटक पटक धेरैजसो नेताहरुले ओलीले धोका दिने त होइन भन्दै सशंकित रहेका छन् । कांग्रेसहरुलाई शंका लागेको मुख्य कारण ओलीले कांग्रेसको समर्थनमा सरकारमा गएको केही समयमा पुनः वाम गठबन्धनको सरकार बनाउने हुन् कि भन्ने डर छ ।