सोमबार बेलायतको ग्रान्थममा सम्पन्न बिहुकोट हेल्प नेटवर्क यूकेको पाँचौं महाधिवेशन तथा दशौं वार्षिक भेलाले शिव कंडेलको अध्यक्षतामा नयाँ कार्यसमिति निर्विरोध निर्वाचित गरेको छ ।

१३ सदस्यीय नवनिर्वाचित समितिमा वरिष्ठ उपाध्यक्ष लिलाराम निउरे, उपाध्यक्ष केशव कंडेल र रामप्रसाद कंडेल तथा महासचिव राजु कंडेल छन् । त्यसैगरी, सचिवमा मुक्ति कंडेल,कोषाध्यक्षमा यामलाल कंडेल तथा सदस्यहरुमा गंगाधर कंडेल, धनकुमारी निउरे, सागर कंडेल, राजेन्द्र कंडेल, सुशिल कंडेल र सिता कंडेल चुनिएका छन् ।

भेलालाई सम्बोधन गर्दै प्रमुख अतिथि अमर उच्च माविका निवर्तमान प्रधानाध्यापक हरिप्रसाद कंडेलले बेलायतमा बसोबास गर्ने बिहुकोटेहरुको योगदानको उच्च मुल्यांकन गरे । उनले सधैभर एकजुट भएर समाज सेवामा लाग्न बेलायतवासी बिहुकोटेहरुलाई आग्रह पनि गरे ।

सभालाई सम्बोधन गर्दै नेटवर्कका संस्थापक अध्यक्ष, सल्लाहकार तथा निर्वाचन समितिका संयोजक दयानिधि सापकोटाले नवनिर्वाचित कार्यसमितिले विश्वव्यापी रुपमा फैलिएका बिहुकोटेहरुलाई एकजुट बनाउन भूमिका निर्वाह गर्ने विश्वास व्यक्त गरे ।

कार्यक्रममा बिहुकोट समाज जापानका पूर्व अध्यक्ष अशोक शर्मा गोपाल, ग्रान्थम नेपाली समाजका कमल भण्डारी, शान्ति नेपाली समाजका प्रवक्ता डिएन खराल, पूर्व सल्लाहकार फुल प्रसाद कंडेलले शुभकामना मन्तव्य राखेका थिए ।

सोही अवसरमा समुदायलाई विशेष योगदान पुर्याउने संस्थापक अध्यक्ष दयानिधि सापकोटा, पूर्व अध्यक्ष प्रेम कंडेल, प्रमुख अतिथि प्राचार्य हरिप्रसाद कंडेल, एकाउन्टेट प्रकाश भट्टराई, बिहुकोट समाज जापानका पूर्व अध्यक्ष अशोक शर्मा गोपाललगायतलाई सम्मान गरिएको थियो।

यसअघि नेटवर्कका अध्यक्ष गंगाप्रसाद कंडेलको अध्यक्षतामा सम्पन्न कार्यक्रममा शिव कंडेलले स्वागत गरेका थिए भने महासचिव कुलपति न्यौपानेले प्रगति प्रतिवेदन तथा कोषाध्यक्ष रमेश कंडेलले आर्थिक प्रतिवेदन पेश गरेका थिए ।

कार्यक्रममा शान्ति नेपाली समाजका पन्चेबाजा र कलाकार सुशिला गौतमको बेजोड सांगीतिक प्रस्तुतिबाट मनोरञ्जन गरिएको कार्यक्रम संयोजक छबिलाल कंडेलले जानकारी गराए ।

२०१४ मा स्थापित बिहुकोट हेल्प नेटवर्क यूके बेलायतमा च्यारिटीमा रजिस्टर भएर विभिन्न सामाजिक कार्यमा सक्रिय रहंदै आएको छ ।