काठमाडौं, २७ साउन । पेरिस ओलम्पिक २०२४ अन्तर्गत आज एक दिनको खेल मात्र बाँकी रहँदा चीन पदक तालिकाको शीर्ष स्थानमा उक्लिएको छ ।

एसियाली देश चीनले हालसम्म ३९ स्वर्ण २७ रजत र २४ कास्य सहित कुल ९० पदक जितेको छ । अन्तिम दिन अघि दोस्रो स्थानमा झरेको अमेरिकाले चीन भन्दा १ स्वर्ण कम जितेको छ । कुल १ सय २२ पदक हात पारेको अमेरिकाले १५औं दिनको समाप्तीसम्म ३८ स्वर्ण, ४२ रजत र ४२ कास्य जितेको छ ।

तेस्रो स्थानमा यथावत अस्ट्रेलियाले १८ स्वर्ण १८ रजत र १४ कास्य सहित कुल ४५ पदक जितेको छ । १५औं दिन अस्ट्रेलियाले थप २ स्वर्ण हात पार्यो ।

चौंथो स्थानमा रहेको जापानले अहिलेसम्म १८ स्वर्ण, १२ रजत र १३ काश्यसहित कुल ४३ पदक जितेको छ । आयोजक फ्रान्सले १६ स्वर्ण सहित कुल ६२ पदक हात पारेको छ ।

१४ स्वर्ण २२ रजत र २२ कास्य जितेको ग्रेट ब्रिटेन छैटौं स्थानमा यथावत छ । ओलम्पिकमा दक्षिण कोरिया, नेदरल्यामन्ड्स र जर्मनी क्रमशः ७औं ,८औं र ९औं स्थानमा छन् । पेरिस ओलम्पिक २०२४ मा आजसम्म सहभागी २ सय ६ मध्य ६२ देशले कम्तिमा एक स्वर्ण पदक जितेका छन् भने ९१ देशले पदकको खाता खोलेका छन् ।

३३औं संस्करणको ग्रिस्म कालिन ओलम्पिक अन्तर्गत आज अन्तिम दिन १३ स्वर्ण पदकका लागी प्रतिस्पर्धा हुने छ ।