काठमाडौँ, १७ फागुन। भगवती युवा क्लब टोखाले आयोजना गरेको म्याराथन प्रतियोगिताको उपाधि श्रीराज डंगोलले हात पारेको छ ।

क्लबको २७ औँ वार्षिकोत्सवका अवसरमा आज टोखामा आयोजित कार्यक्रममा डंगोलले पाँच किलोमिटर दौड १७ मिनेटमा पार गरी उपाधि हात पारेको हो ।

यसैगरी सुजेन्द्र श्रेष्ठले १८ मिनेट र सुनिल श्रेष्ठले १८ मिनेट ५० सेकेण्डमा पाँच किलोमिटर दौड पार गरी क्रमशः द्वितीय र तृतीय भएका छन् ।

यस्तै महिला म्याराथन प्रतियोगिताको उपाधि रोशनी श्रेष्ठले हात पारेको छ । उहाँले तीन २ दशमलव ५ किमीको दूरी १२ मिनेटमा पार गरी उपाधि हात पारेको हो ।

रश्मी श्रेष्ठले १२ मिनेट ५० सेकेण्ड र प्रश्ना श्रेष्ठले १३ मिनेटमा सो दूरी पार गरी क्रमशः द्वितीय र तृतीय हुनुभएको छ ।

प्रतियोगितामा प्रथम हुनेलाई रु तीन हजार, द्वितीयलाई रु दुई हजार र तृतीयलाई रु एक हजार नगद पुरस्कार प्रदान गरिएको क्लबका सचिव अमूल्यकाजी महर्जनले जानकारी दिनुभयो ।

कार्यक्रममा सहभागी उत्कृष्ट खेलाडीलाई पुरस्कार वितरण गर्दै टोखा नगरपालिकाका प्रमुख प्रकाश अधिकारीले भगवती युवा क्लबले खेलकुद क्षेत्रको विकासमा महत्वपूर्ण भूमिका खेलेको बताउनुभयो ।

उहाँले आगामी दिनमा पनि क्लबले सामाजिक कामका अतिरिक्त खेलकुदको विकासका लागि महत्वपूर्ण भूमिका खेल्न विश्वास व्यक्त गर्नुभयो ।