काठमाडौं, २२ फागुन । राष्ट्रपति विद्यादेवी भण्डारीलाई दोहोर्‍याउने या नदोहोर्‍याउने भन्ने निर्णयको मुख्य साँचो एमालेका वरिष्ठ नेता माधवकुमार नेपालमा हातमा पुगेको छ।

राष्ट्रपतिको उम्मेदवार चयनका सम्बन्धमा पार्टीले आज अपरान्ह ३ बजे स्थायी समितिको बैठक बोलाएको छ । स्थायी समितिमा अल्पमतमा पर्ने देखिएपछि ओलीले बरिष्ठ नेताहरुसँग अनौपचारिक छलफल गरेका छन् ।

अनौपचारिक छलफलका क्रममा ओलीले आज विहान बरिष्ठ नेताद्वय माधव नेपाल र झलनाथ खनाल, त्यसैगरी पार्टी उपाध्यक्ष बामदेब गौतम, सचिव बिष्णु पौडेललाई प्रधानमन्त्री निवास बालुवाटार बोलाएका थिए ।

ओलीले नेताहरुसँग वर्तमान राष्ट्रपति विद्यादेवी भण्डारीको भूमिका सन्तुलित र राम्रो रहेको बताएका थिए । राष्ट्रपति भण्डारीको भूमिकाको प्रसंशा गरेपछि ओलीले भनेका थिए, ‘जसलाई बनाएपनि सर्वसम्मतिका साथ उम्मेदवार चयन गरौं।’ आजको भेटवार्तालाई अन्य नेताहरुले राष्ट्रपतिमा भण्डारीलाई नै दोहो(याउने ओलीको चाहनाका रुपमा बुझेका छन् ।

तर बैठकमा ओलीले अप्रत्यक्ष रुपमा भण्डारीको पक्षपोषण गरेपनि अरु नेताहरुले भने केही प्रतिक्रिया जनाएका थिएनन् ।

राष्ट्रपतिको लागि एमालेबाट पूर्वप्रधानमन्त्री झलनाथ खनालले इच्छा देखाएका छन् । खनालले स्थायी कमिटिको बैठकमै आफू राष्ट्रपति बन्न चाहेको बताएका थिए । माधव नेपाल पक्ष पनि भण्डारीलाई दोहो-याउन भन्दा खनाललाई नै राष्ट्रपति बनाउन सकारात्मक देखिएको छ ।

यदि स्थायी समितिमा नेपालले खनालको समर्थन गरेको खण्डमा उनको राष्ट्रपतिको दाबेदारी बलियो बन्नेछ। तर, खनाललाई समर्थन गर्दा अध्यक्ष तथा प्रधानमन्त्री ओली चिढिने र त्यसले आफ्नो यात्रामा असर पुग्ने भएकाले नेपालले खनाललाई समर्थन गरिहाल्ने सम्भावना भने न्यून छ।

यस्तै नेपाली कांग्रेस पनि बिद्या भण्डारीको विपक्षमा उभिने संकेत देखिएको छ । भण्डारीले आफ्नो कार्यकालमा राष्ट्रपति पदको मर्यादा विपरित राष्ट्रियसभाको सदस्य मनोनयन जस्ता विषयमा दलीय स्वार्थबाट प्रेरित भएर गरेको कांग्रेसको आरोप छ ।

यसले राष्ट्रपति को बन्ने भन्ने विषयमा नेपाल पक्षले लिने निर्णय नै निर्णायक देखिन्छ ।