काठमाडौं २३ पुस । नेकपा माओवादी केन्द्रमा उपमहासचिवद्वय जनार्दन शर्मा र वर्षमान पुन पक्षधर नेताहरूले विशेष महाधिवेशन माग गरेका छन् । पार्टीको जारी केन्द्रीय समितिको बैठकमा सोमबार बोल्ने नेताहरू विशेष महाधिवेशनको विषयमा विभाजित भएर प्रस्तुत भएका हुन् ।

‘जनार्दन पक्षधर नेताहरूले अलि बढी विशेष महाधिवेशनको माग गरिराख्नुभएको थियो । त्यही बेला ओनसरी घर्तीले पनि विशेष महाधिवेशनको पक्षमा आफूलाई प्रस्तुत गर्नुभयो,’ एक केन्द्रीय सदस्यले जानकारी दिए ।

उनका अनुसार जनार्दन पक्षधर नेताहरूले गरम रूपमा विशेष महाधिवेशन माग गर्दा वर्षमान पक्षधर नेताहरूले अलिक नरम भएर विशेष महाधिवेशन माग गरेका छन् ।

तर, प्रचण्ड पक्षधर नेताहरूले भने विशेष महाधिवेशन माग गर्ने समय अहिले नरहेको भनेर काउन्टर जवाफ फर्काएका छन् ।

विशेष महाधिवेशनबारे एक नेताले भनेका थिए, ‘अहिले अंश खोज्ने बेला होइन । बाली भित्र्याउने बेला हो । पार्टीले प्राप्त गरेको सफलता जनतामा लैजाने बेला हो । यो बेला पार्टी अभियानमै जानुपर्छ । महाधिवेशनको समय अझै बाँकी छ ।’

आइतबार प्रचण्डले आफू नवौं महाधिवेशनबारे प्रष्ट रहेको भन्दै केन्द्रीय सदस्यहरूलाई दुई विकल्प दिएका थिए । पहिलो– अहिलेको केन्द्रीय समितिलाई महाधिवेशन आयोजक समिति बनाएर जाने । दोस्रो – ६ महिना विभिन्न अभियान चलाएर त्यसपछि फेरि केन्द्रीय समितिको बैठक राखेर निर्णय गर्ने ।

प्रचण्डले भनेका थिए, ‘अहिले नै महाधिवेशन आयोजक समिति बनाएर जान पनि कुनै समस्या छैन । ६ महिना विभिन्न अभियान चलाऔं र जनतामा एक खालको ऊर्जा भरेर अगाडि बढौं भन्ने मेरो अर्को प्रस्ताव छ । यी दुई विषयमा यहाँहरूले प्रष्ट धारणा राख्नुहोला ।’

धारणा राख्ने क्रममा नेताहरू भने दुवै मतका पक्षमा देखिएका हुन् । ‘नेताहरू अभियान चलाउनुपर्ने र पार्टीको अभियान चलाउने समय भएको भनेर तत्काल महाधिवेशनबारे निणय नगर्ने दुवै पक्षमा प्रस्तुत भएका छन्,’ ती नेताले भने ।

माओवादी अध्यक्ष प्रचण्डले आइतबार केन्द्रीय समितिको बैठकमा ३० पेजको राजनीतिक प्रतिवेदन प्रस्तुत गरेका थिए । त्यसमाथि बोल्ने भनेर १८० जनाले नाम टिपाएका थिए । त्यसमध्ये सोमबार ८० जनाले धारणा राखेका थिए । मंगलबार बाँकीले राख्नेछन् ।