काठमाडौं १८ पागुन । प्रधानमन्त्री केपी शर्मा ओलीले कर्णाली प्रदेशसभा बैठकमा विशेष सम्बोधन गर्ने भएका छन् । फागुन २३ गते बस्ने प्रदेश सभा बैठकमा उनले विशेष सम्बोधन गर्ने निश्चित भएको कर्णालीका मुख्यमन्त्री यामलाल कँडेलले बताए ।

मुख्यमन्त्री कँडेलले आइतबार प्रधानमन्त्री ओलीलाई भेटेर यससम्बन्धी पत्र हस्तान्तरण समेत छन् । काठमाडौँमा प्रधानमन्त्री ओलीलाई भेटेर मुख्यमन्त्री कँडेलले विशेष सम्बोधनका लागि निम्ता पत्र समेत हस्तान्तरण गरेका हुन् ।

मध्य पश्चिम विश्वविद्यालयको दीक्षान्त समारोहमा सहभागी हुन सुर्खेत आउन लागेका प्रधानमन्त्री ओलीले सोही क्रममा प्रदेशसभाको बैठकलाई पनि सम्बोधन गर्ने गरी प्रदेश सरकारले निमन्त्रण गरेको हो ।

कर्णाली प्रदेशसभा नियमावली, २०८१ को नियम २२९ को उपनियम ९२० बमोजिम नेपालको राष्ट्रपति, उपराष्ट्र, प्रधानमन्त्री, प्रतिनिधि सभाका सभामुख र राष्ट्रिय सभाका अध्यक्षले सम्बोधन गर्न पाउने व्यवस्था रहेको प्रदेश सभा सचिव जीवराज बुढाथोकीले जानकारी दिए ।

‘पाँच शीर्ष पदमा आसीन सम्माननीय व्यक्तित्वहरूले प्रदेश सभामा सम्बोधन गर्न चाहेमा प्रदेश सभामुखज्यूले अनुमति दिन सक्ने नियमावलीमै व्यवस्था गरिएको छ,’ सचिव बुढाथोकीले अनलाइनखबरसँग भने ।

प्रधानमन्त्रीको विशेष सम्बोधनका लागि कर्णाली प्रदेश सरकारले भने सभालाई अझै पत्र पठाइ नसकेको सचिव बुढाथोकीले बताए । ‘प्रधानमन्त्रीको विशेष सम्बोधन हुने भएपछि सोही अनुसारको सभा व्यवस्थापनका लागि प्रदेश सरकारले आधिकारिक पत्र सभालाई पठाउँछ,’ उनले भने, ‘त्यो पत्र अझै सभालाई त आएको छैन । एक दुुई दिनमा आउँछ होला ।’

प्रदेश सभाको पहिलो कार्यकालमा तत्कालीन राष्ट्रिय सभा अध्यक्ष गणेश प्रसाद लिमिल्सेनाले प्रदेश सभामा विशेष सम्बोधन गरेका थिए ।