काठमाडौं २२ चैत । काठमाण्डौ उपत्यकामा हिजो, अस्तिको तुलनामा वायु प्रदूषण कम भएको छ । वायुको वेग हिजोको तुलनामा आज धेरै भएकाले प्रदूषण केही घटेको मौसमविद प्रतिभा मानन्धरले जानकारी दिनुभयो । पूर्णरुपमा सुधार हुन भने अझै केही दिन लाग्ने उहाँको भनाइ छ ।

हावाको गुणस्तर मापन गर्ने आईक्यू एअरका अनुसार आज पनि काठमाण्डौ विश्वकै सबैभन्दा प्रदूषित शहर बनेको छ । तर काठमाण्डौको वायुको एअर क्वालिटी इन्डेक्स ९एक्यूआई० भने हिजोको भन्दा घटेको छ ।

हिजो ३५२ रहेको एक्यूआई आज २३२ मा झरेको छ । हावाको गुणस्तर मापन सूचक एक्यूआई तीन सयभन्दा माथि पुग्नुलाई सबैका लागि खतरनाक अवस्था मानिन्छ । हावामा प्रदूषणको मात्रा बढेसँगै अस्पतालमा छाती, आँखा, नाक, कान र घाँटीका बिरामीको चाप बढेको छ ।

वातावरण विभागले सूचना निकालेर घरबाहिर निस्कँदा अनिवार्य मास्क प्रयोग गर्न र प्रदूषण उच्च भएको समयमा घरबाहिर ननिस्कन अनुरोध गरेको छ । यस्तै स्वास्थ्य मन्त्रालयले विज्ञप्ति निकालेर अत्यावश्यक कामबाहेक घरबाहिर ननिस्कन, यात्रा गर्दा अनिवार्य रूपमा मास्क लगाउन र अत्यधिक प्रदूषण भएका क्षेत्रमा नजान अनुरोध गरेको छ ।