काठमाडौं ५ बैशाख । भारतका गृहमन्त्री अमित शाहले नेपालको पशुपतिनाथदेखि भारतको तिरुपतिसम्म नक्सलवादीहरूको सपना चकनाचुर भएको दाबी गरेका छन्।

भारतीय सञ्चारमाध्यमका अनुसार उनले नक्सलवादीहरू नेपालदेखि आन्ध्र प्रदेशसम्म आफ्नो प्रभुत्व स्थापित गर्न चाहन्थे तर अहिले उनीहरू चार जिल्लामा मात्र सीमित रहेको बताए।

भारतीय गृहमन्त्री शाहले निमचमा बिहीबार आयोजित सीआरपीएफ स्थापना दिवसका अवसरमा उक्त कुरा बताएका हुन्।

उनले भने, ‘सीआरपीएफ केन्द्रीय रिजर्भ पुलिस बल को योगदानका कारण केही दिनमै देश नक्सलवादबाट मुक्त हुनेछ।’

नक्सल शब्दको उत्पत्ति भारतीय राज्य पश्चिम बंगालको एउटा सानो गाउँ नक्सलबारीबाट भएको हो, जहाँ भारतीय कम्युनिस्ट पार्टीका नेता चारु मजुमदार र कानु सन्यालले १९६७ मा सरकारविरुद्ध सशस्त्र आन्दोलन सुरु गरेका थिए। यसैले यस आन्दोलनको नाम नक्सलवाद भनिएको हो।

नक्सलवाद माओवादी क्रान्तिकारी आन्दोलनको भारतीय नाम हो। यसका मुख्य नेता चारु मजुमदार थिए। उनलाई ‘नक्सलवादका पिता’ पनि भनिन्छ। उनी माओवादमा विश्वास गर्थे र चिनियाँ कम्युनिस्ट पार्टीका नेता माओ त्सेतुङलाई विश्व कम्युनिस्ट आन्दोलनका आदर्श नेता मान्थे।

नक्सलवादी आन्दोलनको प्रभाव नेपालमा समेत उत्तिकै परेको थियो। झापामा २०२७(२०२८ सालमा भएको झापा विद्रोहलाई नक्सलवादी आन्दोलनबाट प्रभावित मानिन्छ। १० वर्षे सशस्त्र युद्धमा पनि नेपालका माओवादी र भारतका नक्सलवादीबीच सहकार्य भएको थियो भनिन्छ।