झापा, साउन १५ । भारतसँग सिमा जोडिएको झापाको दक्षिणी क्षेत्रमा कचनकवल लगायतका क्षेत्रलाई तस्कर समूहले ट्राञ्जिट पोइन्ट बनाएका छन् ।

झापा प्रहरीले भद्रपुर र काकरभिट्टा नाकामा निगरानी बढाएसँगै तस्कर समूहले पछिल्लो कचनकवल लगायतका क्षेत्रलाई ट्राञ्जिट पोइन्ट बनाएका हुन् । तस्कर र स्थानीय नेपाल प्रहरी, सशस्त्र प्रहरी र अनुसन्धानका प्रहरीसँग लाइन मिलाएर दैनिक लाखौं मुल्य बराबरको अबैध सामान भित्राउने श्रोतको दावी छ ।

हल्दीबारी क्षेत्रमा मौलायो तस्करी
पछिल्लो समय हल्दीबारी क्षेत्रमा समेत तस्करी मौलाएको छ । जिल्ला प्रहरी कार्यालय झापाबाट खटिएको टोलीले शनिवार विशेष सुराकीको आधारमा हल्दिवारी–५ स्थित जलथलको क्षेत्रको जंगलको बाटोबाट अबैध सामान बरामद गरेको छ । तर, प्रहरीको निसानामा ५० हजार मुल्यको अबैध सामान मात्र पर्यो ।

स्रोतका अनुसार हल्दिबारी क्षेत्रमा बस्ने रञ्जित साह हल्दीबारी क्षेत्रमा तस्करको एजेन्ट हुन । प्रहरीले शनिवार साहकै घर लैजाँदै गरेको सामान बरामद गरेको हो । शाहले भारतका मोहम्मद अजबुल र नेपालका घेरा राजवंशीसँग मिलेर तस्करी गर्दै आएको समेत खुलासा भएको छ । अजुबल भारतबाट नेपाल भित्राउने र राजवंशी नेपाल भित्राइएको सामान एजेन्ट शाहको घरसम्म पु¥याउने व्यक्ति रहेको विशेष स्रोतले दावी गरेको छ ।

पहिला कम मुल्यका सामान्य सामान मात्र ओसार पसार गर्दै आएका साहले पछिल्लो समय करोडौको सामात्र भित्राउन थालेको बताइँन्छ । एक स्थानीय भन्छन् : साह भन्सार छलेर मासिक लाखौ मुल्य बराबरको सामान नेपाल भित्राउँने गर्छन् ।
स्थानीयवासीका अनुसार ठूलै समूह बनाएर तस्करी गर्दै आएका रञ्जित साहले ठूलो परिणाममा लत्ताकपडा, हार्डवेयरका सामग्री, इलोक्ट्रोनिक्स र सुर्तीजन्य वस्तु अबैध रुपमा केचना नाकाबाट नेपाल भित्राउने गरेका छन् ।

प्रहरीको मिलेमतोमा तस्करी
सामान्यबाट बढेमानको तस्करी बनेका रञ्जित साहलाई कचनकवल र हल्दिवारीका प्रहरीको समेत साथ मिलेको छ । उनले त्यस क्षेत्रका प्रहरीलाई मासिक रुपमा पैसा बुझाएर तस्करी गरिरहेको स्रोताले हामीलाई जानकारी दिएको छ । उनले, घेराबारी प्रहरीमा मासिक १२ हजार, केचनामा १२ हजार र पथरियामा ५ हजार रुपैयाँ बुझाउँदै आएका छन् । तस्करबाट मासिक रकम बुझ्नेमा शसस्त्र प्रहरीको समेत नाम जोडिएको छ ।

भातरीय तस्करको पैसा नेपाली प्रहरीलाई
नेपालका तस्करको पैसा लिइरहेको घेराबारी, केचना र पथरियाका प्रहरीले रञ्जित शाहका भारतीय तस्करा जोडी मोहम्मद अजबुलसँग पनि पैसा लिने गरेको पत्ता लागेको छ । भारतीय तस्कर अजुबलले केचना, घेराबारी र पथरियाका प्रहरीलाई मासिक ३ देखि ५ हजारसम्म लाइन बुझाउँने गरेका छन् ।

पैसा खाएको पाए कारवाही : प्रहरी
कचनकवलमा पर्ने केचना र घेराबारी नाकाबाट पछिल्लो समय गाजा, ड्रक्स, अफिम लगायतका लागुऔषध समेभ नेपाल भित्रिरहेको प्रहरीको दावी छ । यी क्षेत्रबाट नेपाल लागुऔषध वित्रिरहेको आफुलाई समेत जानकारी आएको जिल्ला प्रहरी कार्यालय झापाका एसपी शैलेस थापा क्षेत्री बताउँछन् । लागुऔषध भित्रिएकोबारे जानकारी प्राप्त भएपछि त्यसक्षेत्रका प्रहरी इन्चार्जलाई समेत सचेत गराइसकिएको जिल्ला प्रहरी कार्यालयका भनाइ छ । तस्करीसँग साठगाठ गरेको पाए कारवाही गरिने बताउँछन् एसपी क्षेत्री ।

झापाका प्रहरीसँगको मिलेमतोमा भइरहेको तस्करीबारे अडियो रेकर्ड हामीले प्राप्त गरेका छौं । स्रोतको सुरक्षाका दृष्टिले हामी अडियो रेकर्ड सार्वजनिक गर्न असमर्थ छौं ।