काठमाडौँ, ११ चैत । चैत्र शुक्ल नवमी अर्थात् रामनवमीको अवसर पारेर आज अपराह्न ५ बजे विश्वको सामूहिक चेतना वृद्धिका लागि सहयोग पु-याउन आठ हजार भन्दा बढीले भावातीत ध्यानसहित सिद्धि कार्यक्रम गरे ।

ग्रीनवीच समय रेखालाई आधार मानेर प्रत्येक देशको समयअनुसार अपराह्न ५ बजे १९२ देशमा ध्यानसहितको सिद्धि कार्यक्रम गरिएको नेपाल महर्षि वैदिक फाउन्डेसनका अध्यक्ष एवं पूर्वगृहराज्य मन्त्री दीपकप्रकाश बाँस्कोटाले राससलाई जानकारी दिनुभयो ।

नेपालमा फाउन्डेसनको कार्यालय सिफल, भावातीत ध्यानसहित सिद्धि कार्यक्रम लागू भएका देशभरका ७५ गुरुकूल, भावातीत ध्यान सहित सिद्धि कार्यक्रम र चेतनामा आधारित शिक्षा लागू भएका विद्यालय र बनेपास्थित चेतना केन्द्रमा गरी आठ हजारभन्दा बढी नेपालीले एकैपटक सामूहिक ध्यानमा सहभागी भएर विश्वव्यापी अभियानलाई सहयोग पु¥याएको उहाँले बताउनुभयो ।
विश्वशान्ति राष्ट्रका प्रधानमन्त्री डा वेभेन मोरिसको प्रत्यक्ष निगरानीमा दोस्रो पटक विश्वव्यापीरुपमा सामूहिक ध्यान कार्यक्रम आयोजना गरिएको हो । कार्यक्रमले विश्वको सामूहिक चेतनाको सहसम्बद्धतामा वृद्धि गरी दिगो विश्व शान्तिका लागि योगदान गर्ने विश्वास गरिएको छ ।

यसअघि पुस २९ गते वैदिक ज्ञानका विश्वव्यापी प्रचारक महर्षि महेश योगीको १०१औँ जन्मजयन्तीका अवसरमा पहिलो पटक विश्वव्यापी भावातीत ध्यानसहित सिद्धि कार्यक्रम गरिएको थियो । नेपालमा यो कार्यक्रमको संयोजन फाउण्डेसनले गरेको थियो । सो कार्यक्रममा नेपालबाट सात हजार ५०० ध्यानीले सहभागिता जनाएका थिए ।

भावातीत ध्यान ऋग्वेदको १०औँ मण्डलबाट लिइएको हो । आद्य शंकराचार्यले वैदिक ज्ञान प्रचारप्रसारका लागि स्थापना गरेका चार मठमध्ये ज्योतिर्मठका शंकराचार्य ब्रह्मानन्द सरस्वतीले महेश योगीलाई भावातीत ध्यानसहितको वैदिक ज्ञान दिनुभएको थियो ।

शंकराचार्य ब्रह्मानन्दको आज्ञाअनुसार महर्षि महेश योगीले भावातीत ध्यानसहितको सिद्धि कार्यक्रमको विश्वव्यापी प्रचारप्रसार गर्नुभएको फाउण्डेसनले जनाएको छ ।