काठमाडौं, १० जेठ। देशका केही स्थानमा आज पनि वर्षा हुनेछ । केही प्रदेशमा बिहानैदेखि वर्षा भइरहेको छ ।
गण्डकी, लुम्बिनी, कर्णाली र सुदूरपश्चिम प्रदेशका केही स्थामनमा बिहानैदेखि वर्षा भइरहेको छ । मौसमविद् सञ्जिव अधिकारीका अनुसार यी प्रदेशमा हल्कादेखि मध्यम वर्षा भइरहेको छ । “लुम्बिनी र कर्णाली प्रदेशका केही स्थानमा पछिल्लो तीन घण्टामा भारी वर्षा भएको छ,” मौसमविद् अधिकारीले भने ।

उनका अनुसार काठमाडौंमा बिहान मौसम सफा भए पनि दिउँसो वर्षा हुनेछ । “राति पानी परे पनि बिहान मौसम सफा छ । तर, दिउँसो बदली भएर पुनः वर्षा हुनेछ,” उनले भने, “काठमाडौंमा हल्कादेखि मध्यम वर्षा हुनेछ ।” मौसमविद् अधिकारीका अनुसार दिउँसो देशभर आंशिकदेखि साधारणतया बदली रहनेछ ।

वाग्मती, गण्डकी, लुम्बिनी र कर्णाली प्रदेशलगायत देशका पहाडी भूभागका थोरै स्थानमा र बाँकी भूभागका एकदुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ । उच्चपहाडी तथा हिमाली भूभागका एकदुई स्थानमा हल्का वर्षा र हिमपातको सम्भावना छ ।

मौसमविद् अधिकारीले कोसी, मधेस, वाग्मती, गण्डकी र लुम्बिनी प्रदेशलगायत देशको पहाडी भूभागमा आंशिकदेखि साधारणतया बदली रहनेछ ।
बाँकी भूभागमा मौसम मुख्यतया सफादेखि आंशिक बदली रहनेछ । कोसी, मधेस, वाग्मती, गण्डकी र लुम्विनी प्रदेशलगायत पहाडी भूभागका एकदुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ ।
कोसी, वाग्मती, गण्डकी र कर्णाली प्रदेशको उच्च–पहाडी तथा हिमाली क्षेत्रका एकदुई स्थानमा हल्का वर्षा र हिमपातको सम्भावना रहेको मौसमविद् अधिकारीले जानकारी दिए ।