काठमाडौ, १३ असार । बुधबार देशका तीन वटा प्रदेशमा स्थानीय तहको निर्वाचन हुँदैछ । वर्षायाममा निर्वाचन हुने भएकाले निर्वाचनमा असर पर्ने देखिएको छ । मौसम पुर्वाअनुमान शाखाले बधबार पुर्वी वायुका कारण मौसम दिनभरी नै सक्रिय रहने जनाएको छ । निर्वाचन हुने तीन वटै प्रदेशमा छिटफुट बर्षा साथै पुर्वी पहाडी भु भागमा बढी बर्षात हुने विभागको अनुमान छ ।
स्थानीय तहको दोस्रो चरणको निर्वाचन प्रदेश नम्बर १, ५ र ७ मा बुधबार बिहान ७ बजेबाट मतदान हुने कार्यक्रम छ । लामो समयपछि हुन लागेको यो स्थानीय तहको निर्वाचनका लागि सरोकारवालादेखि सम्पुर्ण नागरिक नै हौसिएका छन । तर मनसुन समय भएकाले र त्यसमा पनि भौगोलिक विकटताका कारण मतदाताहरुको सहभागिता र मत कतिको खस्ने हो भन्ने चिन्ता छ । मनसुनको समय भएकाले बुधबार पनि दिनभरी नै मौसम सक्रिय रहने मौसम पूर्वानुमान महाशाखाले जनाएको छ । पहाडी भु भागमा पानी अझ बढी पर्ने सम्भावना रहेको मौसम पुर्व अनुमान शाखाका वरिष्ठ मौसमविद् राजुधर प्रधानाङ्गले जानकारी दिए ।
प्रधानाङ्गका अनुसार निर्वाचन हुने तीन वटै प्रदेशमा बर्षाको सम्भावना रहे पनि पुर्वी पहाडी क्षेत्रमा अझ बर्षा बढी हुने सम्भावना छ ।
निर्वाचन प्रभावकारी रुपमा सफल बनाउन जिम्मेवार निकाय निर्वाचन आयोगले मनसुनलाई मध्यनजर गरी पाल, टेन्ट आदि खरिद तथा भाडामा नै लिएर भएपनि ब्यवस्थित बनाउने प्रयास गरेको निर्वाचन आयोगका प्रवक्ता सूर्यप्रसाद शर्माले जानकारी दिए । मतदानको दिन बुधबार पानी पर्न सक्ने मौसम्विद्को भनाईपछि आयोगले वर्षातबाट मतदाता र मतपेटिका जोगाउन आवश्यक ब्यबस्था मिलाउन निर्देशन दिइसकेको समेत शर्माले बताए ।
बिहान पख बादल लाग्ने भएपनि दिउँसोबाट पानी पर्ने सम्भावना रहेकाले बिहानको समयमै मतदान गरिसक्नु उपयुक्त हुने मौसमविदहरुको सुझाव छ । साथै पानीबाट जोगिन छाता, रेनकोट (वर्षादी) बोकेर हिंडन पनि निर्वाचन आयोगले भनेको छ । वर्षायाममै भए पनि मतदान गर्न नागरिक उत्साहित छन् । त्यसैले नागरिकको मताधिकार प्रयोगलाई सहजता प्रदान गर्न सम्बन्धित निकायले ध्यान दिनु जरुरी छ ।