काठमाडौ २ साउन । भौतिक पूर्वाधार तथा यातायातमन्त्री देवेन्द्र दाहालले सरकारले गएको आर्थिक वर्षमा निर्माण कम्पनीहरूलाई ८ अर्ब ६६ करोड रुपैयाँ भुक्तानी गरेको बताउनुभएको छ ।

सिंहदरबारमा आज बसेको पूर्वाधार विकास समितिको बैठकमा बोल्दै मन्त्री दाहालले यो जानकारी गराउनुभएको हो । उहाँले गएको आर्थिक वर्षमा ८ अर्ब ६६ करोड रुपैयाँ अघिल्लो वर्षको भुक्तानी गरेको बताउनुभयो । उहाँले गएको आर्थिक वर्षमा केही कागजातहरू नपुगेका निर्माण कम्पनीहरूलाई भने भुक्तानी नगरिएको र साउनभित्र भुक्तानी गरिसक्ने प्रतिबद्धता जनाउनुभयो ।

रणनीतिक सडक सञ्जालमा भएका पुलहरुको ५६ करोड रुपैयाँ भुक्तानी भने गर्न नसकेको मन्त्री दाहालले स्वीकार गर्नुभयो । उहाँले कन्काई पुल समयमा बन्न नसक्ने स्थिति रहेको भए तत्काल ठेक्का तोडेर नयाँ ठेक्काका लागि प्रक्रिया अघि बढाइने बताउनुभयो । अधुरा परियोजना सम्पन्न गर्न पर्याप्त रकम नभएको उहाँको गुनासो छ ।

यस्तै बैठकमा भौतिक पूर्वाधार तथा यातायातमन्त्री देवेन्द्र दाहालले वातावरणमैत्री सडक संरचना बनाउने कुरामा सरकारले ध्यान दिइरहेको बताउनुभयो । उहाँले संविधान र मन्त्रालयले पनि अपाङ्गमैत्री र वातावरणमैत्री सडक संरचना बनाउने कुरा गरेको भन्दै त्यसमा आफूहरू लागिरहेको उल्लेख गर्नुभयो ।

ठाउँ–ठाउँमा लिफ्टको व्यवस्था गर्ने, आकाशे पुल बनाउने कुरामा मन्त्रालयले योजनाबद्ध रूपमा काम गरिरहेको पनि मन्त्री दाहालले बताउनुभयो ।