११ साउन । रसुवा – नेपाल–चीनबीचको उत्तरी नाका रसुवागढीको मितेरी पुलमा चिनियाँ पक्षले बेलीब्रिज निर्माण शुरु गरेको छ । अघिल्लो महिना बाढीले बगाएको मितेरी पुलको ठाउँमा अस्थायी बेलिब्रिज निर्माण कार्य शुरु गरिएको हो । यो निर्माणसँगै अवरुद्ध नेपाल–चीन सडक सम्पर्क पुनः शुरु हुने अपेक्षा गरिएको रसुवाका प्रमुख जिल्ला अधिकारी अर्जुन पौडेलले जानकारी दिनुभयो ।

गएको असार २४ गते ल्हेन्दे खोलामा आएको बाढीले पुलमा क्षति पुर्‍याएको थियो । पक्की पुल निर्माणका लागि साविकको ठाउँलाई यथावत् छाडी दुई मिटर पूर्वतर्फ सारेर पुरातात्विक संरचनालाई कुनै असर नपार्ने गरी बेलीब्रिज निर्माण शुरु भइसकेको उहाँले जानकारी दिनुभयो ।

पौडेलका अनुसार नेपाल–चीनबीच आवतजावत र व्यापारिक कारोबार बन्द भएपछि पहिलो चरणअन्तर्गत चीन सरकारले बेलीब्रिज निर्माण गर्नेछ । पुलका लागि चाहिने आवश्यक औजार चिनियाँ पक्षले रसुवागढी ल्याइसकेको छ । बेलीब्रिजको निर्माण आउँदो भदौ ३० गतेभित्र सम्पन्न गर्ने चिनियाँ पक्षको तयारी छ ।