काठमाडौं २३ भदौ । सोमबार काठमाडौं लगायत देशभर भएका प्रदर्शनमा १९ जनाको मृत्यु हुनुका साथै ४सय ५० भन्दा बढी नागरिक घाइते भएका छन् । यो हत्याकाण्ड र सरकारको नालायकीको जिम्मेवार ठान्दै प्रधानमन्त्री ओलीको चौतर्फी राजीनामा मागिएको छ ।
राजीनामा माग्नेमा एमालेकै केन्द्रीय सदस्य उषाकिरण तिम्सिनादेखि रास्वपाकी सुमना श्रेष्ठ सम्म रहेका छन् ।
विद्युत प्राधिकरणका पूर्व कार्यकारी निर्देशक कुलमान घिसिंगदेखि राप्रपा सम्मले पनि प्रधानमन्त्री ओलीको राजीनामा मागेका छन् । देशभरका विभिन्न तहमा क्रियाशील एमालेका कार्यकर्ताहरुले पार्टी परित्याग गर्ने पनि लहर चलेको छ ।
सत्तारुढ नेपाली कांग्रेसका वरिष्ठ नेता शेखर कोइरालाले वर्तमान सरकारको औचित्य सकिएको बताएका छन्।

सोमबार साँझ उनले सामाजिक सञ्जालमार्फत् आज सरकारका कारण देशमा जे भयो, त्यसको परिकल्पना सभ्य समाजमा कसैले पनि गर्न नसक्ने पनि बताएका छन्।

‘जनताप्रति अनुत्तरदायी, जनताको आवाज सुन्न र बुझ्न नसक्ने निरंकुश क्रुर सरकारले हातमा किताब कापी बोकेर देशभित्रै आफ्नो उज्ज्वल भविष्यको परिकल्पनामा डुबेका कलिला युवा बिध्यार्थीहरुमाथि बर्वर ढंगवाट गोली प्रहार गरेको छ,’ उनले सामाजिक सञ्जालमा लेखेका छन्, ‘श्रद्धाञ्जलीका केही शब्दले राष्ट्रकै यो अपुरणीय क्षतिमा मल्हम लगाउन सक्दैन। आजको लोकतन्त्रमा आफ्ना कुकृत्य लुकाउन सामाजिक सञ्जाल बन्द गर्नु अधिनायकवाद भन्दा अरु के होला र रु देशवाट भ्रष्टाचार निर्मुल हुनैपर्छ। आजवाट वर्तमान सरकारको औचित्य पुरै समाप्त भएको छ। तपाईं हामी मिलेर देशका हरेक समस्याको विधि सम्मत समाधान खोजौँ।’

राष्ट्रपति रामचन्द्र पौडेलले मुलुकभर आज भएको जेनजी पुस्ताको प्रदर्शनका क्रममा ठूलो संख्यामा नागरिकहरूको हताहत भएको घटनाले आफू मर्माहत भएको बताएका छन्।

उनले घटनामा परी निधन भएका परिवारप्रति गहिरो समवेदना तथा सहानुभूति व्यक्त गर्दै घाइतेहरूको सिघ्र उपचारका लागि सरकारलाई आग्रह पनि गरेका छन्।

राष्ट्रपति पैडेलले अप्रत्याशित रुपमा आज भएको यस्तो घट्नाले आफूलाई अत्यन्त चिन्तित तुल्याएको उल्लेख गरेका छन्।
यसैगरी नेकपा माओवादी केन्द्रका उपमहासचिव वर्षमान पुनले जेनजी आन्दोलनमा भएको हत्या र दमनको जिम्मेवारी प्रधानमन्त्री केपी ओलीले लिनुपर्ने बताएका छन् । ओलीको अहंकार र अधिनायकवादी चरित्रका कारण घटना भएकोले त्यसको सम्पूर्ण जिम्मेवारी उनैको हुने पुनले बताए ।

‘जेनजी पुस्ताको आन्दोलनमा भएको बलप्रयोग र हत्याको जिम्मेवारी प्रधानमन्त्री केपी ओली र उनको नेतृत्वमा रहेको नालायक सरकारले लिनुपर्छ,’ पुनले भने।

ओलीले नैतिकताका आधारमा तत्काल राजीनामा दिनुपर्ने उनको माग छ । उनले थपे, ‘यो परिस्थितिले उत्पन्न हुनुमा ओलीको अभिनायकवादी, निरंकुश र स्वेच्छाचारी प्रवृत्ति जिम्मेवार छ । घटनाले ओलीको असली चरित्र उदांगो पारेको छ । पदमा बस्ने नैतिकता गुमाएकाले उनले तत्काल राजीनामा दिनुपर्छ ।’

पुनले जेनजी पुस्ताले उठाएका जायज मागको समर्थन गर्दै सामाजिक सञ्जालमाथिको प्रतिबन्ध आजै हटाउन पनि सरकारसँग माग गरे । अभिव्यक्ति स्वतन्त्रतालाई कुण्ठित पार्ने गरी सामाजिक सञ्जालमा लगाइको बन्देज अस्वीकार्य भएको उनको भनाइ छ ।