काठमाडौं, २२ चैत । राष्ट्रियसभाका अध्यक्ष गणेशप्रसाद तिमिल्सिनाले राष्ट्रियसभाको भूमिकालाई प्रभावकारी बनाउने प्रतिवद्धता व्यक्त गर्नु भएको छ ।

अध्यक्ष तिमिल्सिनाले राष्ट्रिय तथा अन्तर्राष्ट्रिय अनुभवको समेत अध्ययन गरेर राष्ट्रियसभालाई परिपक्व र प्रभावकारी सदनको रुपमा स्थापित गर्ने योजना अघि सार्नुभयो ।

विहिबार राष्ट्रियसभाका सदस्यहरुको अन्तरक्रिया कार्यक्रमलाई उद्घाटन गर्दै तिमिल्सिनाले राष्ट्रियसभाको औचित्यमाथि प्रश्न उठाउने गरेको उल्लेख गर्दै त्यसको औचित्य र आवश्यक्ता पुष्टि हुनेगरी काम गर्न पनि राष्ट्रियसभाका सदस्यहरुको गम्भिर ध्यानाकर्षण गराउनु भयो ।

उहाँले प्रतिनिधिसभा भएपछि राष्ट्रियसभा किन चाहियो भन्ने प्रश्नको जवाफ दिने गरी काम गर्न राष्ट्रियसभाका सदस्यहरुको क्षमता अभिवृद्धिका लागि आवश्यक कार्यक्रम संचालन गर्ने बताउनुभयो ।

कार्यक्रममा राष्ट्रियसभाको आवश्यक्ता र औचित्यमाथि प्रकाश पार्दै पूर्व सांसद एवम् वरिष्ठ अधिवक्ता खिमलाल देवकोटाले राष्ट्रियसभाको दायरा प्रतिनिधिसभाको भन्दा ठूलो रहेको दावी गर्नुभयो । उहाँले प्रतिनिधिसभाको कामको निरीक्षण गर्ने दायित्व राष्ट्रियसभाको भएको उल्लेख गर्नुभयो ।

कार्यक्रममा राष्ट्रियसभाले गर्ने कामका विषयमा राष्ट्रिय तथा अन्तर्राष्ट्रिय अनुभवका विषयमा पनि छलफल गरिएको थियो ।