काठमाडौं — नेपाली कांग्रेसका सभापति गगन थापाले पार्टीको १५औँ महाधिवेशनलाई लक्षित गर्दै स्पष्ट कार्यतालिका सार्वजनिक गरेका छन् ।
सानेपास्थित पार्टी केन्द्रीय कार्यालयमा आज सुरु भएको केन्द्रीय कार्यसमिति बैठकमा प्रस्तुत गरिएको तालिकाअनुसार कांग्रेसले अब पूर्ण रूपमा महाधिवेशनकेन्द्रित गतिविधि अघि बढाउने भएको छ ।
गगन थापाद्वारा प्रस्तुत महाधिवेशन कार्यतालिका :
- वैशाख १ देखि मसान्तसम्म : क्रियाशील सदस्यता नवीकरण र वितरण
- असार १५ सम्म : क्रियाशील सदस्यता छानबिन
- असार मसान्तसम्म : क्रियाशील सदस्यता वितरण
- साउन ६ : वडा अधिवेशन
- साउन १२ : गाउँपालिका/नगरपालिका अधिवेशन
- साउन २३ : प्रदेशसभा क्षेत्र अधिवेशन
- साउन ३० : प्रतिनिधिसभा क्षेत्र अधिवेशन
- भदौ ४ र ५ : जिल्ला अधिवेशन
- भदौ १५ र १६ : प्रदेश अधिवेशन
- भदौ २८ देखि २९ : केन्द्रीय महाधिवेशन
सभापति थापाले बैठकमा भने, “मैले महाधिवेशनको गाडी हाँकेको छु । अब यो गाडी रोकिँदैन । विशेष महाधिवेशनमा को थिए, को थिएनन् भन्ने पुरानो विवाद बिर्सेर सबैलाई समेटेर अघि बढ्छु ।”
बैठकमा ५ मुख्य एजेण्डा
केन्द्रीय कार्यसमिति बैठकमा महामन्त्री प्रदीप पौडेलले निम्न ५ एजेण्डा प्रस्तुत गरेका छन् :
- समसामयिक संविधान संशोधन अध्ययनका लागि विज्ञ समिति गठन
- १५औँ महाधिवेशनको तयारी
- उम्मेदवारसँग प्रदेशस्तरीय निर्वाचन समीक्षा
- प्रदेश तथा स्थानीय सरकारको प्रभावकारी सञ्चालन
- भ्रातृ संघ, शुभेच्छुक संस्था तथा जनसम्पर्क समितिको भूमिका
प्रतिनिधिसभा निर्वाचनपछि पहिलो पटक केन्द्रीय कार्यसमिति बैठकमा उपस्थित सभापति गगन थापाले महाधिवेशनलाई केन्द्रमा राखेर पार्टी पंक्तिलाई एकजुट हुन आह्वान गरेका छन् ।
कांग्रेसले अब वैशाख १ बाट नै क्रियाशील सदस्यता नवीकरण अभियान सुरु गर्दै महाधिवेशनको रुटम्याप स्पष्ट पारिसकेको छ ।
प्रतिक्रिया दिनुहोस्