काठमाडौं ३० वैशाख । राष्ट्रिय स्वतन्त्र पार्टीले आफ्नो पहिलो महाधिवेशन आगामी असार ७, ८ र ९ गते चितवनमा गर्ने निर्णय गरेको छ।

आज बिहान बसेको केन्द्रीय समिति बैठकले महाधिवेशनको नयाँ मिति तय गरेको नेता गणेश पराजुलीले जानकारी दिएका छन्। यसअघि सभापति रवि लामिछानेले असार ६, ७ र ८ गते महाधिवेशन गर्ने प्रस्ताव गरेका थिए। तर बैठकले अन्ततः असार ७, ८ र ९ गते चितवनमा आयोजना गर्ने निर्णय गरेको हो।

महाधिवेशनको तयारी र अन्य विविध एजेन्डाबारे छलफल गर्न पार्टी कार्यालय वनस्थलीमा बैठक आयोजना गरिएको थियो।

पार्टीले यसअघि नै चुनावपछि ६ महिनाभित्र महाधिवेशन गर्ने सैद्धान्तिक निर्णय गरेको थियो। सोहीअनुसार भदौभित्र महाधिवेशन सम्पन्न गर्नुपर्ने व्यवस्था रहे पनि अब असारमै महाधिवेशन गर्ने निर्णय गरिएको हो। राष्ट्रिय स्वतन्त्र पार्टी २०७९ सालमा गठन भएको हो।