काठमाडौं १३ जेष्ठ । श्रम संस्कृति पार्टीका अध्यक्ष हर्कराज राईले प्रधानमन्त्रीलाई सदनमा उपस्थित गराएर जवाफदेही बनाउन सभामुखसँग जोडदार माग गर्नुभएको छ ।

बुधवार प्रतिनिधि सभाको बैठकमा बोल्दै राईले नियमावलीको नियम १५ उपनियम (२) अनुसार प्रधानमन्त्रीलाई सदनमा बोलाउन सभामुखलाई आग्रह गर्नुभयो ।

उहाँले लामो समयदेखि यो माग गर्दै आए पनि सभामुखबाट प्रभावकारी रुलिङ नभएको भन्दै असन्तुष्टि व्यक्त गर्नुभयो । राईले भन्नुभयो – प्रधानमन्त्रीलाई सदनमा ल्याएर जवाफदेही बनाउन नसके सदनको गरिमा कसरी कायम रहन्छ ?

राईको चुनौती : “प्रधानमन्त्रीज्यूलाई यहाँ ल्याउन सक्नुहुन्न भने नियमावलीको ३१ (१) प्रयोग गरेर मलाई सदनबाट निष्कासन गर्नुहोस् । कि त प्रधानमन्त्रीलाई बोलाउनुहोस्, होइन भने मलाई निस्केर जा भन्नुहोस् ।”

राईले सभामुखको बाध्यता बुझे पनि नियम पालना नहुँदा सदनको मर्यादा खस्किएको टिप्पणी गर्नुभयो ।