दैलेख, १८ जेठ । सुर्खेतबाट कालिकोटतर्फ जाँदै गरेको एक यात्रुवाहक जिप दैलेखमा दुर्घटना हुँदा ३ जनाको मृत्यु भएको छ भने ५ जना गम्भीर घाइते भएका छन्।

सु.प ०१००१ च ४९६४ नम्बरको बोलेरो जिप दैलेखको भैरवी गाउँपालिका–५ स्थित कालगौडाको भिरमा सडकबाट करिब ४ मिटर तल खसेको प्रहरीले जनाएको छ।

दुर्घटनामा जिपमा सवार ८ जनामध्ये १ महिला र २ पुरुषसहित ३ जनाको घटनास्थलमै मृत्यु भएको जिल्ला प्रहरी कार्यालय दैलेखले जानकारी दिएको छ। मृतकहरूको पहिचान भने अझै खुल्न सकेको छैन।

घाइते ५ जनालाई स्थानीयवासी, सुरक्षाकर्मी र प्रहरीले उद्धार गरी उपचारका लागि जिल्ला अस्पताल दैलेखमा पठाइएको छ। उनीहरूको अवस्था गम्भीर रहेको बताइएको छ।

प्रारम्भिक अनुसन्धानअनुसार तीव्र गतिका कारण ब्रेक फेल भई दुर्घटना भएको हुनसक्ने प्रहरीको अनुमान छ। घटनाबारे थप अनुसन्धान भइरहेको प्रहरीले जनाएको छ।