काठमाडौं । क्यान्सर उपचारको क्षेत्रमा चिकित्सकहरूले महत्वपूर्ण उपलब्धि हासिल गरेको दाबी गरेका छन् । उपचारले निको हुन नसकेका बिरामीहरूको ट्युमर पूर्णरूपमा निको पार्ने एक नयाँ इन्जेक्सनको चिकित्सकहरूले सफल परीक्षण गरेका हुन् ।

जोन्सन एन्ड जोन्सन कम्पनीले विकास गरेको ‘अमिभान्तामाब’ नामक यो सिरिन्जको ११ वटा देशमा क्लिनिकल परीक्षण गरिएको थियो ।

नयाँ ‘ट्रिपल–एक्सन’ उपचारात्मक खोपले शरीरभर फैलिएको क्यान्सरका ट्युमरलाई समेत पूर्ण रूपमा हटाउन सक्ने सम्भावना देखाएको अनुसन्धानकर्ताहरूले बताएका छन् ।

अनुसन्धानकर्ताहरूका अनुसार परम्परागत किमोथेरापी र इम्युनोथेरापीबाट अपेक्षित परिणाम प्राप्त नभएका तथा उपचारका विकल्प सीमित भएका बिरामीहरूमा समेत यो नयाँ उपचार विधिले उत्साहजनक नतिजा दिएको छ ।

परीक्षणमा क्यान्सर शरीरका अन्य भागमा फैलिसकेका, पुनः बल्झिएका वा उपलब्ध उपचारले प्रभाव नपारेका बिरामीहरूलाई सहभागी गराइएको थियो ।

अध्ययनमा सहभागी बिरामीहरूमध्ये एक तिहाइभन्दा बढीमा ट्युमरको आकार उल्लेखनीय रूपमा घटेको पाइएको बताइएको छ ।

सबैभन्दा महत्वपूर्ण उपलब्धि भने १५ जना बिरामीमा देखिएको छ, जसमा क्यान्सरका ट्युमर पूर्ण रूपमा हराएको चिकित्सकहरूले पुष्टि गरेका छन् । विशेषज्ञहरूका अनुसार यस्ता बिरामीहरूमा उपचारका विकल्प लगभग समाप्त भइसकेका थिए ।
लन्डनस्थित इन्स्टिच्युट अफ क्यान्सर रिसर्च (आईसीआर)का जैविक क्यान्सर उपचार विशेषज्ञ प्राध्यापक केभिन ह्यारिङ्टनले यस्तो नतिजालाई अभूतपूर्व भन्दै उपचार विज्ञानमा नयाँ आशाको संकेत भएको बताएका छन् ।

“किमोथेरापी र इम्युनोथेरापी दुवैप्रति प्रतिरोधी भइसकेका बिरामीमा यति प्रभावकारी प्रतिक्रिया देखिनु अत्यन्त दुर्लभ घटना हो । यदि, आगामी परीक्षणहरू सफल भएमा यसले हरेक वर्ष हजारौँ क्यान्सर बिरामीलाई नयाँ जीवन दिन सक्ने विश्वास गरिएको छ,” उनले भनेका छन् ।

अनुसन्धान विशेषगरी टाउको तथा घाँटी र यसको आसपास क्षेत्रमा हुने क्यान्सरका बिरामीमा केन्द्रित थियो । अध्ययनमा सहभागी १०२ जना बिरामीमध्ये ४३ जनामा उपचारको सकारात्मक प्रभाव देखिएको छ ।

तीमध्ये २८ जनाको ट्युमर उल्लेखनीय रूपमा सानो भएको थियो भने १५ जनाको शरीरबाट क्यान्सर पूर्णरूपमा हटेको पाइएको अनुसन्धान प्रतिवेदनमा उललेख छ ।

टाउको तथा घाँटीको क्यान्सर विश्वभर सबैभन्दा बढी देखिने क्यान्सरमध्ये छैटौँ स्थानमा पर्छ । विशेष गरी ‘एचपीभी–नेगेटिभ’ प्रकारका बिरामीमा उपचार जटिल मानिने भएकाले यो उपलब्धिलाई अझ महत्वपूर्ण मानिएको छ ।

फोक्सो, पेट र मस्तिष्क क्यान्सरमा पनि अध्ययन जारी
अमेरिकी औषधि कम्पनी जोनसन एन्ड जोनसनद्वारा विकसित यो उपचार विधिको परीक्षण फोक्सोको क्यान्सर भएका बिरामीमा पनि भइरहेको छ । प्रारम्भिक नतिजाले त्यहाँ पनि सकारात्मक संकेत देखाएको अनुसन्धानकर्ताहरूले बताएका छन् ।

हाल फोक्सो, मलाशय, मस्तिष्क, पेट तथा अन्य प्रकारका क्यान्सरका लागि करिब ६० वटा छुट्टाछुट्टै क्लिनिकल परीक्षण सञ्चालन भइरहेका छन् । ती अध्ययनको नतिजाले यो उपचारलाई व्यापक रूपमा प्रयोगमा ल्याउन सकिने वा नसकिने विषय स्पष्ट पार्ने अपेक्षा गरिएको छ ।

वैज्ञानिकहरूका अनुसार एमिभान्टामाबले क्यान्सरविरुद्ध एकैपटक तीनवटा माध्यमबाट काम गर्छ । पहिलो, यसले क्यान्सर कोषिकाको वृद्धि र विस्तारमा सहयोग गर्ने ईजीएफआर नामक प्रोटिनलाई निष्क्रिय बनाउँछ । दोस्रो, उपचारबाट बच्न क्यान्सर कोषिकाले प्रयोग गर्ने (मिट) नामक जैविक मार्ग (पाथवे) बन्द गरिदिन्छ । त्यस्तै, बिरामीको आफ्नै रोग प्रतिरोधात्मक प्रणालीलाई सक्रिय बनाएर क्यान्सर कोषिकामाथि आक्रमण गर्न उत्प्रेरित गर्छ ।

विशेषज्ञहरूका अनुसार यही तीन तहको संयुक्त प्रभावका कारण यो उपचार अन्य विधिभन्दा बढी प्रभावकारी देखिएको हो ।

यो उपचार सहज उपचार, कम साइड इफेक्ट रहेको बताइएको छ । धेरैजसो क्यान्सर उपचार अस्पतालमा भर्ना भएर घण्टौंसम्म सलाइनमार्फत औषधि दिनुपर्ने प्रकृतिका हुन्छन् । तर ‘एमिभान्टामाब’ भने छालामुनि सानो सुईमार्फत दिइने भएकाले बिरामीले बाह्यरोगी सेवा ओपीडीबाटै उपचार लिन सक्नेछन् ।

प्रत्येक तीन सातामा एकपटक दिइने यो उपचारमा गम्भीर साइड इफेक्टको दर पनि न्यून रहेको अध्ययनले देखाएको छ । विशेषज्ञहरूले यो उपलब्धिलाई क्यान्सर उपचारको दिशामा महत्वपूर्ण मोडका रूपमा व्याख्या गरेका छन् । तर, यसलाई तत्काल ‘क्यान्सरको पूर्ण उपचार’ घोषणा गर्न भने हतारो गर्न नहुने बताएका छन् ।

अनुसन्धान अझै क्लिनिकल परीक्षणकै चरणमा रहेको र दीर्घकालीन प्रभाव, सुरक्षा तथा विभिन्न प्रकारका क्यान्सरमा यसको प्रभावकारिताबारे थप अध्ययन आवश्यक रहेको उनीहरूको भनाइ छ । द गार्जियनबाट ।