काठमाडौं २६ जेष्ठ । ऊर्जा, जलस्रोत तथा सिँचाइ मन्त्रालयले नेपाल विद्युत् प्राधिकरणलाई ५० अर्ब एक करोड रुपैयाँ विद्युत् महसुल बक्यौता असुल गर्न निर्देशन दिएको छ ।

नियमित रूपमा उठ्नुपर्ने महसुल नउठेको, पुरानो बक्यौता तथा डेडिकेटेड र ट्रंक लाइनको महसुल असुलीमा समस्या देखिएपछि मन्त्रालयले कडाइका साथ प्रक्रिया अघि बढाउन निर्देशन दिएको हो ।

ऊर्जा, जलस्रोत तथा सिँचाइमन्त्री विराजभक्त श्रेष्ठले प्राधिकरणलाई महसुल असुलीलाई दैनिक कार्यसूचीको उच्च प्राथमिकतामा राखेर अघि बढ्न निर्देशन दिनुभएको छ ।

मन्त्री श्रेष्ठका अनुसार डेडिकेटेड फिडर र ट्रंक लाइन मात्र नभई इन्टरनेट सेवा प्रदायक, औद्योगिक क्षेत्र तथा सडक बत्ती लगायतका सबै क्षेत्रबाट बाँकी बक्यौता असुल गर्नुपर्नेछ ।

उहाँले कानुनी प्रक्रियामा रहेका विषय बाहेक अन्य सबै बक्यौता संकलनमा प्राधिकरण ढिला गर्न नहुने स्पष्ट पार्नुभएको छ ।

महालेखा परीक्षकको ६३औँ वार्षिक प्रतिवेदनमा पनि ठूलो मात्रामा विद्युत् महसुल बक्यौता रहेको उल्लेख गरिएको छ ।