काठमाडौं १ असार । सातवटै प्रदेश सरकारले आज आगामी आर्थिक वर्ष २०८३/८४ का लागि वार्षिक बजेट सार्वजनिक गर्दै छन्। संवैधानिक तथा कानुनी व्यवस्था अनुसार प्रत्येक वर्ष असार १ गतेभित्र प्रदेश सरकारले आफ्नो आयव्ययको विवरण प्रदेश सभामा पेश गर्नुपर्ने प्रावधानअनुसार आज सम्बन्धित प्रदेशका आर्थिक मामिला तथा योजना मन्त्रीहरूले बजेट प्रस्तुत गर्न लागेका हुन्।

यसअघि नै सातै प्रदेश सरकारका नीति तथा कार्यक्रम प्रदेश सभाबाट पारित भइसकेकाले बजेट प्रस्तुत गर्ने बाटो खुलेको छ। प्रदेश सभाहरूले तय गरेको कार्यतालिकाअनुसार सबैभन्दा पहिले मधेश प्रदेशले दिउँसो १ बजे बजेट सार्वजनिक गर्नेछ भने कर्णाली प्रदेशले दिउँसो ३ बजे बजेट प्रस्तुत गर्ने तयारी गरेको छ। त्यसैगरी कोशी, बागमती र गण्डकी प्रदेशले दिउँसो ४ बजे आ–आफ्नो प्रदेश सभामा बजेट पेश गर्ने कार्यतालिका बनाएका छन्। लुम्बिनी र सुदूरपश्चिम प्रदेशले भने साँझ ५ बजे बजेट प्रस्तुत गर्ने तयारी पूरा गरेका छन्।

प्रदेश सरकारहरूले आगामी आर्थिक वर्षका लागि विकास निर्माण, पूर्वाधार विस्तार, रोजगारी सिर्जना, कृषि, शिक्षा, स्वास्थ्य तथा सामाजिक सुरक्षालगायतका क्षेत्रलाई प्राथमिकतामा राखेर बजेट ल्याउने अपेक्षा गरिएको छ। बजेटमार्फत प्रदेश सरकारहरूले आगामी वर्षको आर्थिक नीति, कार्यक्रम तथा विकास योजनाको खाका सार्वजनिक गर्नेछन्।