काठमाडौं, ९ असार । काठमाडौं उपत्यकासहित देशका ११ जिल्लामा बर्डफ्लुको संक्रमण फैलिएको छ। पशु सेवा विभागका अनुसार पछिल्लो तीन महिनामा ८२ स्थानमा बर्डफ्लु पुष्टि भएको छ।

विभागका अनुसार २०८२ साल चैत ४ गते मोरङबाट सुरु भएको संक्रमण हाल झापा, मोरङ, सुनसरी, महोत्तरी, बारा, चितवन, नवलपरासी, काठमाडौं, भक्तपुर, ललितपुर र काभ्रेपलाञ्चोकसम्म फैलिएको हो।

संक्रमण नियन्त्रण तथा रोकथामका क्रममा हालसम्म ५ लाख ६९ हजार ८५८ पन्छी नष्ट गरिएको विभागले जनाएको छ। त्यस्तै ९ लाख ८९ हजार ३१३ अण्डा र १ लाख ९५ हजार ४८५ केजी दाना सुरक्षित रूपमा व्यवस्थापन गरिएको छ।

पशु सेवा विभागका महानिर्देशक डा. उमेश दाहालका अनुसार कोसी प्रदेशका झापा, मोरङ र सुनसरीसहित बारा, महोत्तरी, चितवन र नवलपरासीमा संक्रमण नियन्त्रणमा आइसकेको छ। संक्रमण रोकथामका लागि लगाइएको एक महिने पन्छी ओसारपसार प्रतिबन्ध पनि केही क्षेत्रमा खुकुलो बनाइएको छ।

तर काठमाडौं उपत्यका, ललितपुर, भक्तपुर र काभ्रेपलाञ्चोकका केही क्षेत्रमा भने संक्रमण अझै बढ्दो क्रममा रहेको विभागले जनाएको छ। भाइरसको स्वरूप परिवर्तन भएको छ वा छैन भन्नेबारे अध्ययनका लागि ‘सिक्वेन्सिङ’ प्रक्रिया राष्ट्रिय जनस्वास्थ्य प्रयोगशालासँगको समन्वयमा अघि बढाइएको छ।

विभागले बर्डफ्लु नियन्त्रणका लागि उपमहानिर्देशकको नेतृत्वमा रोग नियन्त्रण कक्ष स्थापना गरी संघ, प्रदेश र स्थानीय तहबीच समन्वय गर्दै कार्य भइरहेको जनाएको छ। प्रभावित क्षेत्रमा आकस्मिक रोग अन्वेषण टोली र द्रूत कार्यदल परिचालन गरी संक्रमित पन्छी तथा सामग्री नष्ट गर्ने काम भइरहेको छ।

परीक्षणका क्रममा बर्डफ्लुसँगै लो प्याथोजेनिक एभियन इन्फ्लुएन्जा, रानिखेत र इकोलाईजस्ता रोगसमेत देखिएको विभागले जनाएको छ। यसले पन्छीपालक किसानलाई उच्च सतर्कता अपनाउन आग्रह गरिएको छ।

विभागले जैविक सुरक्षा कडाइका साथ पालना गर्न, पुराना अण्डाका क्रेट पुनः प्रयोग नगर्न, जंगली र घरपालुवा पन्छीबीच सम्पर्क रोक्न तथा दाना–पानीमा विशेष सावधानी अपनाउन आग्रह गरेको छ।

त्यस्तै, पन्छी तथा पन्छीजन्य सामग्री ओसारपसार गर्दा अनिवार्य भेटेरिनरी प्रमाणपत्र लिनुपर्ने व्यवस्था गरिएको छ। कुनै फार्ममा अस्वाभाविक रूपमा पन्छी बिरामी देखिए वा ठूलो संख्यामा मरे तत्काल नजिकको पशु सेवा कार्यालयलाई जानकारी गराउन विभागले अनुरोध गरेको छ।